Ч.Зотол 

Мэргэжлийн боксын Залуучуудын дэлхийн аварга Г.Баяртогтох,  Солонгосын боксчин  Кым Кы Намыг эх орондоо урьж,  энэ сарын 11-ний 16 цагт  АСА циркт халз тулаан хийх гэж байгаагаа ийнхүү тодорхойлоод  байна. Мэргэжлийн боксын рингэн дээр 29 тулаан хийж, 23 ялалт байгуулсны 20-д  нь  өрсөлдөгчөө  хүнд цохилтоор буулгаж авсан  түүний хувьд энэ удаагийн тулаан залуу тамирчинд хичээл заах хэмжээнд болж өнгөрнө  хэмээн тэрээр үзэж байгаа ажээ.

Түүний намтрын хуудсыг сөхвөл, Г.Баяртогтох  чөлөөт бөхийн ОУХМ, Монголоо төлөөлж хоёр олимпод оролцсон  тамирчин, спортын хүрээнийхэн дотор 52-ын гэж алдаршсан Ганбатын хүү. Бөхчүүд удам дагадаг гэж ярьдаг шиг түүний аавын тал   боксын удамтай. Тиймээс Баяртогтох  боксчдын дунд  өсч, хөлд орж, мөн  боксчин болсон нэгэн. Тодруулбал, боксын спортын гавьяат тамирчин, дасгалжуулагч, Ази тивийн хошой аварга Х.Алтанхуяг  түүний авга ах  юм. Мөн  аавынх нь талаас Пан Азийн аварга, ОУХМ Нэмэхбаяр, спортын мастер  Хосбаяр, Ольга нарын боксчид төрөн гарчээ.  Тэгвэл түүний гэргий  Л.Мандах  Монголын анхны эмэгтэй боксчдын нэг, боксын спортын мастер. Өдгөө боксын  дасгалжуулагч, шүүгчээр ажилладаг ажээ.

Анх бокст хөл тавьсан түүхийг  нь сонирхвол,  Ганбатын Баяртогтох  1994  онд Дорнод аймгийн “Талын бүргэд” клубээс  боксын   гараагаа эхэлжээ. Хадаг барьсан анхны багш нь  гавъяат дасгалжуулагч Ё.Төмөрбат. 1997-2000 онд улсын шигшээ багийн тамирчин байсан.  2000 онд 20 настайдаа  Пан Азийн аварга Н.Лхагвыг дагаж мэргэжлийн бокс руу орсон. 2006 оноос хойш бараг долоон жил завсарлаад өнгөрсөн жил рингэнд гарч Азийн дэлхийн залуучуудын аварга, өөрөөсөө насаар нэлээд дүү  боксчинтой тулаан хийж ялсан. Өдгөө Солонгосын тамирчин Кым Кы Намтай хийх халз тулаан түүний 30 дахь тулаан юм байна.

Түүний амжилтын хуудсыг сөхвөл:

-  1998 оны дэлхийн залуучуудын аварга

-2002 оны WBC холбооны залуучуудын дэлхийн аварга

-2002-2007 оны өмнөд Солонгосын хоёр жингийн аварга

-2000-2007 оны хооронд Азийн мэргэжлийн боксын рейтингээр тогтмол 1-3 дугаар  байрт бичигдэж ирсэн гэсэн мэдээлэл байна.

 Түүний хобби:     тулалдах

Түүнд хүч өгч хурцалдаг  зүйл:    эх орны  газар шороо, аав, ээждээ залбирах

Хэлэх дуртай үг: Бокс бол    ялсан ч,  ялагдсан ч хамгийн  гоё спорт

Хамгийн том  тулаан:  Америкийн Лас Вегаст    Мексикийн тамирчныг  нэгдүгээр раундад  хүнд цохиолтоор рингэнээс гаргасан

-Түүний үзэл баримтлал: Тэр үндэсний үзэлтнүүдийн  нэг. Эх орон, газар шороогоо хайрлан хамгаалахын төлөө тэмцэлд хэзээд бэлэн.  

-Түүний гангараа: шивээс / цээжин дээрээ зэрлэг бух, хүчит лууны дүрс шивүүлсэн. Хоёр гарын шуун дээр Модун Шанью, Галдан Бошигт нарын хэлсэн “Миний нутгийн газар шорооноос бурхан гуйсан ч бүү өг” гэсэн үгийг уйгаржин монгол бичгээр шивүүлжээ/ 

-Түүний зорилго: Зодог тайлах болоогүй. Мэргэжлийн бокст  ойрын таван жилдээ хүч үзнэ. Монголдоо мэргэжлийн боксыг хөгжүүлж, хүүхэд, залуучуудыг бэлтгэнэ.