Т.САЙХАН

ЭМЯ-наас /04.27 ээлжит мэдээллээ хийж, коронавирусын нөхцөл байдлыг танилцууллаа.

Коронавирус- Монголд

 Монгол Улсын хэмжээнд сэжигтэй тохиолдол бүртгэгдээгүй. Нийт гурван лабораторид 161 хүнд шинжилгээ хийхэд коронавирусын халдвар илрээгүй. Ажиглах байранд байгаа 130 хүний давтан шинжилгээнээс коронавирусын халдвар илрээгүй. Үүний дотор ОХУ-аас ирсэн 48 оюутан бий. Тандалтаар таван хүнд шинжилгээ хийхэд коронавирусын халдвар илрээгүй. Алтанбулагийн боомтоор орж ирсэн тээврийн 15 жолоочоос коронавирусын халдвар илрээгүй.  Мөн  Франц иргэн бүрэн эдгэрчээ. Тэрээр 47 хоног эмчлүүлсэн. Анх хүнд ирээд ХӨСҮТ-д эмчилгээнд орсноос хойш дэлхий биднийг харж байсан. Энэ хүнийг эдгээж чадсны хариуг бусад улс манай улсад илгээх байх. Энэ хүнд уушгины нэвчдсийг шимэгдүүлэх зэрэг шинжилгээг өдөр болгон хийсэн  гэж ХӨСҮТ-ийн захирал  Д.Нямхүү мэдээллээ. 

Коронавирус-Дэлхийд

Дэлхийн 213 улс оронд бүртгэгдэж, нийт 2.9 сая хүн өвчлөөд байна. Мөн өвчний улмаас 206 мянган хүн нас барсан бол 877 мянга гаруй хүн эдгэрчээ. Одоогоор уг өвчний улмаас 1.9 сая хүн эмнэлэгт хэвтэж эмчлүүлж байгаа юм.

Коронавирус-ОХУ

ОХУ-д шинээр 6,361 тохиолдол бүртгэгдэж, өвчлөл 80 мянгад хүрээд байна. Москва хотын хувьд 24 цагийн хугацаанд өвчлөлийн тоо буурсан хэдий ч бусад хотуудад өвчлөл тархсаар байна.Тус улсад халдварын өсөлт өнгөрсөн долоо хоногтой харьцуулахад 89 хувьтай байна. Иймд ОХУ-ын ерөнхийлөгч В.Путин энэ өвчнөөр бүх насныхан өвдөх ч жирэмсэн эх, хүүхдүүдэд онцгой анхаарал тавихыг холбогдох мэргэжлийн байгууллагынханд үүрэг болгожээ. Мөн тус улсад тавдугаар сард болох баярын өдрүүдэд гэрийн хатуу хөл хорионы дэглэмийг чанд мөрдөхийг эрүүл мэндийн байгууллагаас анхааруулсан байна.

Коронавирус-БНХАУ-д

БНХАУ-ын Ухань хотод COVID-19 халдварын улмаас эмнэлэг хэвтэж байгаа өвчтөн байхгүй бөгөөд бүх өвчтөн нь эдгэрч эмнэлгээс гарсан гэсэн сайн мэдээ байна.

Эх сурвалж:www.polit.mn