Т.САЙХАН

Нийслэлийн прокурорын газраас ЖДҮХС-гийн зээлтэй холбоотой  асуудлаар Б.Батзориг нарын долоон хүнд яллах дүгнэлт үйлдэн шүүхэд хүргүүлсэн билээ.  Тэгвэл тус хэргийг өнөөдөр /04.22/ БЗД-ийн Эрүүгийн хэргийн анхан шатны шүүх хэлэлцэж, нотлох баримтыг нягтлахаар прокурорт буцаажээ.  Б.Батзоригтой хамт ХХААХҮЯ-ны Төрийн нарийн бичгийн даргын үүрэг гүйцэтгэгчээр ажиллаж байсан Д.Энхбат, ЖДҮХС-гийн захирал асан С.Төгсбилэг, ХХААХҮЯ болон уг сангийн эрх бүхий албан тушаалтнууд болох Ч.Хашчулуун, Э.Чагнаасүрэн, В.Одхүү, Б.Мөнхтулга нарыг улс төрд нөлөө бүхий этгээд болон бусад албан тушаалтнууд эрх мэдлээ урвуулан ашигласан, хээл хахууль авсан, өгсөн гэх үндэслэлээр яллах дүгнэлт үйлдэн прокурорын байгууллагаас шүүхэд хүргүүлсэн. Өмнө нь  энэ сарын 6-ны өдөр хэргийн шүүх хурал болж, шүүгдэгч Б.Батзоригийн өмгөөлөгч Б.Мөнхбат эрүүл мэндийн шалтгааны улмаас эмчийн магадлагаа ирүүлсэн учир шүүх хуралдааныг  хойшлуулаад байв.  Тэгвэл өнөөдөр хэлэлцээд прокурорт буцлаа.

Түүнчлэн өнгөрсөн баасан гаригт болсон чуулганаар УИХ-ын гишүүн Б.Батзоригийг чөлөөлөв.  Тэрээр энэ сарын 3-нд буюу хаврын ээлжит чуулган нээхээс өмнө чөлөөлөгдөх өргөдлөө УИХ-ын дарга Г.Занданшатарт өгөөд байв.  Тэгвэл түүний чөлөөлөгдөх хүсэлтийг парламент хэлэлцэн, нууц санал хураалт зохион байгуулж, 47 гишүүний 27 нь дэмжсэн юм.  Энэ үеэр санал шүүмжлэл хэлэх гишүүн байсангүй, нам жимхэн чөлөөлчихсөн байдаг.  Ийнхүү Б.Батзориг гишүүнээс түдгэлзэж, хэрэг нь прокурорт буцлаа.

Эх сурвалж:www.polit.mn