Т.САЙХАН
Ерөнхийлөгчийн Тамгын газраас сонгуулийг хойшлуулах эсэх асуудлаар өөрийн албан ёсны цахим сайтаараа дамжуулан олон нийтийн дунд санал асуулга явуулсан билээ. Тэгвэл санал асуулгын дүх гарч иргэдийн дийлэнх нь сонгуульд оролцохгүй гэж хариулжээ. Санал асуулгыг дөрөвдүгээр сарын 08-ны өдрийн 18:00 цагт эхлүүлж, дөрөвдүгээр сарын 13-ны 12:00 цагт хаав. "Дэлхий нийтийг түгшээсэн коронавируст цар тахлын үед та эрсдэлд орж 2020 оны УИХ-ын сонгуульд саналаа өгөх үү?” гэсэн асуултад санал асуулгад оролцсон 31935 хүний 52 хувь нь өгөхгүй гэж хариулсан байна. Дэлхийн эрүүл мэндийн байгууллагаас цар тахлын өвчлөлөөс урьдчилан сэргийлэх тодорхой зөвлөмжүүдийг гаргаж, өөрийгөө болон бусдыг халдвараас хамгаалахыг уриалж буй энэ үед сонгуультай холбоотой олон нийтийн цугларалт, бөөгнөрөл үүссэнээр халдварын өвчлөлийг хяналтаас алдах, улмаар сонгуулийн ирц хүрэхгүй байх эрсдэл үүснэ гэж Ерөнхийлөгч Х.Баттулга үзсэн билээ. Ерөнхийлөгч Х.Баттулга 2020 оны гуравдугаар сарын 25-ны өдөр ард түмэндээ хандан уриалга гаргаж, дөрөвдүгээр сарын 6-ны өдөр УИХ-ын хаврын чуулганы нээлтэд оролцож, гаргасан уриалгаа тайлбарлах замаар мэдэгдэл хийсэн.
Эх сурвалж:www.polit.mn