Н.Мөнхжин

Өмнөд Солонгосын эрэг орчимд живсэн “Sewol” хөлөг онгоцны ослоор амиа алдсан хүний тоо 157-д хүрээд байна хэмээн The Korea Herald сонин мэдээлэв. Дахиад мөн ийм тооны хүнийг олж чадаагүй байгаа юм. Аврах, эрж хайх ажилллагаанд 550 мэргэжилтэн, 212 тусгай завь, 34 нисэх онгоц оролцож буй бөгөөд усны гүний түлхэлт хүчтэй байгаа нь хүндрэл учруулж байна. Чэжү арал руу аялалаар явж байсан сурагчид голдуу 476 зорчигч суулгаж явсан “Sewol” хөлөг онгоц дөрөвдүгээр сарын 16-нд сүйрч живсэн юм. 174 хүнийг аварсны дотор хөлгийн ахмад болон экипажийн гишүүдийн олонх нь байсан. Хөлөг онгоцны ахмад, 68 настай Ли Жун Сокийг саатуулж, олон хүний аминд хүрсэн хэргээр шалгаж байна. Тэрээр өөрийгөө зорчигч хэмээн итгүүлж, хамгийн түрүүнд живж буй хөлөг онгоцыг орхисон юм.

Амьд гарсан хүмүүсийн баталж буйгаар, хөлөг онгоц живж эхлэх үед хөлгийн экипаж хүмүүсийг зайлуулах, гаргах ямар нэг арга хэмжээ аваагүй, зөвхөн “Тайван байцгаа, байрнаасаа, суудлаасаа холдож болохгүй” гэж анхааруулж байжээ. Мөн Reuters мэдээлж буйгаар, сүйрлийн анхны мэдээг экипаж бус, айж балмагдсан нэгэн хүүхэд өгчээ. Үүний дараа 20 орчим хүүхэд мөн ослын дохиог дамжуулсан аж.