Б.ТУУЛ Шинэ коронавирусын  халдварын эрсдэлээс  урьдчилан сэргийлэх зорилгоор манай улсын хилийн боомтууд түр хугацаагаар хаагдаж, нүүрсний экспорт зогссон билээ.  Тавантолгой-Гашуунсухайт боомтын чиглэлд уртын тээвэрт 1200 орчим тээврийн хэрэгсэл дотоодын нүүрс тээвэр хийхээс бусад 10000 орчим тээврийн хэрэгсэл бүрэн зогсчээ. Нүүрсний экспорт зогссоноор улсын төсвийн орлого өдөрт 27 тэрбум төгрөгөөр тасалдаж, тээврийн компаниудын өр зээлийн хүү алданги нэмэгдэж, санхүүгийн байдал нь хүндэрч байгаа  талаар өчигдөр “Үндэсний мэдээллийн төв”-д тээвэрчдын төлөөлөл мэдээлэл хийлээ.  “Баянзам” тээвэрчдийн холбоо Төрийн бус байгууллагын удирдах зөвлөлийн дарга П.Баярхүү “Төрийн байгууллагууд болон иргэд аж ахуйн нэгж байгууллагууд хүнд нөхцөл байдалд хэрхэн ажиллах, эрх ашгаа хамгаалах талаар эрх зүйн мэдлэг мэдээлэл дутмаг, бэлтгэлгүй байснаас өмнө нь байгуулсан гэрээний төлбөр, хүү торгууль, алдангийн дарамтад орж эхэллээ. Хэрэв  төлбөрөө хугацаандаа төлж чадахгүй бол хоногийн 0.5 хувийн алданги тооцдог. Энэ нь 2-3 сая төгрөг, биш 20-30 сая төгрөг гэсэн үг. Авто зам ашиглах гэрээний 9.1-т  давагдашгүй хүчин зүйлийн улмаас талуудын аль нэг нь гэрээгээр хүлээсэн үүргээ биелүүлэх боломжгүй болсон бол хариуцлагаас чөлөөлөгдөнө гэж заасан  байдаг. “Тал нутгийн хөгжлийн  зам” ХХК гэрээний энэхүү зүйл заалтаа баримтлаад хариуцлагаас чөлөөлөгдсөн. Гэтэл тэрхүү заалт нь богинын тээвэрт үйлчлээд уртын тээврийн жолооч нарт үйлчлэхгүй байна” гэв. Одоогийн нөхцөлд Засгийн газар болон эрх бүхий байгууллагаас давагдашгүй хүчин зүйл тулгарсан болохыг тогтоолгосны дараа тээврийн компаниуд дээрх заалтыг үндэслэн замын хураамж төлөлтийн хугацааг сунгуулах, түр хойшлуулах боломж байгаа талаар хуульчид зөвлөсөн. Үүнийг холбогдох байгууллагууд нь авч хэлэлцээч. Монгол Улсын Засгийн газраас БНХАУ нүүрс худалдан авагч импортлогч талаас хамаарсан онцгой нөхцөл үүссэн гэдэг тогтоол гарган, нүүрс тээврийн 170 гаруй ААНБ, 14000 тээвэрчин, тэдний гэр бүлийг эрсдэлээс хамгаалах хэрэгтэй байна. Мөн авто замын төлбөрийн уртын тээврийн хөлсийг 2019 оны эхээр тээврийн хөлс 100-110 юань байхад боломжит үнэ гэж үзэн тогтоож байсан. Одоо уртын тээврийн хөлсийг БНХАУ-ын худалдан авагч талаас 60-55 юань болгож унагаасан. Энэ үнийн уналтын нөлөөллийн асуудлыг “Гашуун сухайт авто зам” ХХК нь 2020 оны зам ашиглалтын гэрээндээ анхаарч тусгах талаар зөвшилцөх ёстой" гэв. Эх сурвалж: www.polit.mn