Улс орны дээд албан тушаалтнуудыг хамгаалах үүрэг хүлээдэг АНУ-ын Нууц алба Вашингтон дахь Цагаан ордонд үүрлэж, дохиоллын системд саад болсоор байгаа нэгэн үнэгтэй хэдэн сарын турш амжилтгүй хөөцөлдөж байна хэмээн Wall Street Journal мэдээлэв. Өнгөрсөн оны намар төсвийн хямралаас болж төрийн албан хаагчид амралтаа авахаас өөр аргагүй болсны дараа сайхь үнэг Цагаан ордны хашаан дотор үзэгдэх болжээ. Тэрхүү үнэг тэргүүн хатагтай Мишель Обамагийн газар хагалж, ногоо тарьж байсан хэсэгт үүрлэн зарим шөнө түгшүүр дэгдээж, аюулгүйн дохиоллыг хангинуулдаг болсон байна. Тэр бүү хэл Ерөнхийлөгч Б.Обама нэг удаа үнэгийг Цагаан ордны багануудын хоорондуур гүйхийг харж гайхаж байсан удаатай.

Нууц албаны ажилтнууд үнэгний хэд хэдэн занга худалдан авч цэцэрлэгийн янз бүрийн газар байрлуулжээ. “Зальт шар”-ыг хуурахын тулд тахианы мах зэргээр өгөөш тавьсан ч амжилт олсонгүй. Wall Street Journal мэдээлж буйгаар, Нууц албаны ажилтнууд үнэгийг буудах, эсвэл ямар нэг аргаар хөнөөх санаагүй байгаа аж. Харин амьдаар нь барьж, холгүй орших нэгэн ойд нутагшуулахаар төлөвлөж буй бололтой.

Цагаан ордон нь анхны Ерөнхийлөгч Жорж Вашингтоноос бусад АНУ-ын бүх Ерөнхийлөгчийн албан өргөө, амьдрах газар болсоор иржээ. Төрийн тэргүүний албан өргөөний эргэн тойрон дахь цэцэрлэгийн талбай долоон га газрыг хамран оршдог. Вашингтон хотод мөн марал буга голдуу зэрлэг амьтадтай өргөн уудам ой, цэцэрлэг байдаг билээ.