Америк иргэдийн 60 хувь нь Ерөнхийлөгч Барак Обамад итгэхгүй байна. “Fox News” телевизээс утсаар явуулсан санал асуулгын дүн ингэж гарчээ. Асуулгад хамрагдсан иргэдийн 37 хувь нь “Цагаан ордны тэргүүн ихэнх цагийг худлаа ярьж өнгөрөөдөг” гэсэн бол, 24 хувь нь “Обама заримдаа үнэнийг хэлдэггүй” гэжээ. Америкуудын дөнгөж 15 хувь нь Ерөнхийлөгчдөө итгэж байгаа нь харагдав. Иргэдийн 42 хувь нь төрийн тэргүүнийхээ үйл ажиллагааг дэмжиж байгаа бол, 51 хувь нь түүнд сэтгэл дундуур байгаа аж. Санал асуулгад насанд хүрсэн мянга гаруй америк иргэн хамрагдсан байна.

Б.Обамагийн мэдэгдэл бодит байдалтай нийцдэггүй хэмээн Бүгд найрамдах намынхан болон хэвлэл мэдээллийн зарим хэрэгсэл шүүмжилдэг. Тухайлбал, Ливийн Бенгази хот дахь АНУ-ын дипломат төлөөлөгчийн газрыг лалын хэт даврагчид довтолж Америкийн элчин сайдын аминд хүрсний дараа Б.Обама бодит байдлыг нуун дарагдуулсан мэдээлэл өгсөн хэмээн буруутгадаг аж.