Хоёр толгой, хоёр хүзүү, нэг биетэй төрсөн энэтхэг охид зүрхний дутагдлын улмаас амьсгал хураасан тухай Daily Mail мэдээлэв. Сиамын ихэр гуравдугаар сарын 13-нд мэндэлсэн юм. Делигийн анагаахын хүрээлэнгийн эмч нар тэдний амийг аврах гэж 20 хоног оролдоод бууж өгчээ. Сиамын ихрийн эмзэг биед халдвар нэвтэрч, тэссэнгүй хорвоог орхив.

Ихэр охидын ээж, 28 настай Урмила Шарма хүүхдүүдээ харж чадсангүй. Охидыг төрөнгүүт эхээс нь салгаж, тусгай инкубаторт хийсэн юм. Нөхөр Субхаш уй гашууд автсанаа нуусангүй. “Тэд амьд үлдэх магадлал тун бага гэдгийг эмч нар биднээс нуугаагүй. Гэсэн хэдий ч бид сүүлчийн мөч хүртэл итгэсээр байлаа” хэмээн тэрээр өгүүлэв. 28 настай Шарма Сиамын ихэр төрүүлэх гэж буйгаа амаржахынхаа өмнөхөн мэджээ. Эхнэр, нөхөр хоёрт хэт авианы зураг авахуулах мөнгө байгаагүй тул жирэмслэлтийн эрт үед нь харуулж чадаагүй байна. “Эхнэр минь дахиад хөл хүнд болвол мөнгө хайрлахгүй зургийг нь авахуулна” хэмээн Субхаш хэллээ.

Өнгөрсөн онд Энэтхэгийн Калькутта хотод толгойноос нь бас нэг толгой ургасан урьд хожид үзэгдээгүй ихэр төржээ. Энэ нь 45 мянган төрөлтөд нэг удаа тохиолддог “энцефаломенингоцел” хэмээх онош бөгөөд найман сарын дараа хүүгийн илүү толгойг амжилттай салгаж авсан юм. Хэдэн жилийн өмнө Бразилд хоёр толгойтой, нэг зүрх нэг элэгтэй охин төрсөн билээ. Тэрээр эрүүл саруул өсч байгаа төдийгүй хоёр толгой нь тусдаа сэтгэж, тусдаа ажиллаж байгаа нь эрдэмтэн, судлаачдыг гайхашруулж байгаа аж.