Холливудад хамгийн их алдаршсан хятад угсаатан Жеки Чан 60 насны босгыг давлаа. Тэрээр Хонконг дахь Францын консулын хаалгач, гэрийн үйлчлэгчийн гэр бүлд мэндэлжээ. Бээжингийн дуурийн сургуульд суралцсан Жеки хөвгүүн найман наснаасаа л эхлэн Хятадын зодоонтой киноны олны хэсэгт оролцон тоглодог байв. Алиа хошин зантай Жеки Чан кун-фугийн мастер болж, жүжиглэх чадвараа хөгжүүлснээр дэлхийн супер оддын нэг болсон юм.

Түүний нэр Гиннесийн аварга амжилтын номд дөрвөнтөө дурдагдсан байдаг. Тэрээр Мадам Тюссогийн лааны тосон музейд заларсан цорын ганц ази үндэстэн. Мөн Холливудын өргөн чөлөө болон Хонконгийн эргийн гудамжинд өөрийн одтой. Жеки Чан “Дэлхийг 80 хоногт тойрсон нь” кинонд тоглоод 25 сая долларын цалин авч байжээ.

Зартай жүжигчин, зодооны урлагийн нэртэй мастер, продюсер, дуучин эр өнөөдөр 117 кино, 11 цомгийн ард гарчээ. Зодоонтой киноны зураг авахуулж байхдаа олон удаа гэмтэж, бэртэж байсан Жеки Чан “Надад айдас байхгүй, орлон тоглогч ч байхгүй. Надтай эн зэрэгцэх хүн ч байхгүй” гэсэн уриатай. Жеки 1982 онд Тайванийн жүжигчин бүсгүй Линь Фэнцяотой гэрлэж Жейси хэмээх хүүтэй болсон юм. Жейси дуучин болжээ. 1999 онд жүжигчин Элейн У Цили Жеки Чаны охиныг төрүүлсэн ч зодоонтой киноны нэрт мастер маань энэ хүүхдээ хүлээн зөвшөөрөөгүй юм.