М.ХҮСЛЭН

Энэ сарын 5-нд Афганистанд Ерөнхий­лөгчийн болон орон нутгийн сонгууль боллоо. Үндсэн хуулиар гурав дахь удаагаа сонгогдох эрхгүй болсон Хамид Карзайн оронд сонгогчид төрийн тэргүүнээ сонгохоор сонгуульд санал өгөв. Санал хураах байрнууд орон нутгийн цагаар 07.00 цагт үүдээ нээсэн байлаа. Сонгуульд санал өгөх ёстой 12 сая сонгогчийн 7 сая буюу 58 хувь нь саналаа өгчээ. Афганистаны Ерөнхийлөгч Хамид Карзай цаг агаарын таагүй байдал болон “Талибан”-ы сүрдүүлгийг үл харгалзан санал хураах байранд ирж саналаа өгсөн бүх сонгогчдын идэвхийг өндрөөр үнэлж, баярлаж талархсанаа илэрхийлжээ.   

Санал хураалт эхэлсний дараа санал хураах цэгүүдээс түгшүүртэй мэдээ ирж байлаа. Хэт даврагчдын “Талибан” хөдөлгөөнийхөн сонгуулийг тасалдуулахыг оролдсон ба террорын халдлагад 20 хүн өртөж, 43 хүн шархаджээ. Цэрэг, цагдаагийн 350 мянга орчим алба хаагч хамгаалалтад гарчээ.

Сонгуулийн санал тоолох ажил өгчигдөр эхэлж, энэ сарын 24 хүртэл үргэлжилнэ. Урьдчилсан дүн 24-нд гарна. Ерөнхийлөгчид нэр дэвшигч найман хүний гурав нь сонгогдох магадлал өндөртэй гэж шинжээчид дүгнэж байна. Афганы Гадаад хэргийн сайд байсан Залмай Расул, экс Сангийн сайд Ашраф Гани Ахмадзай болон Гадаад хэргийн сайд асан Абдулла Абдулла нар нэр дэвшээд байна.

Хэрэв нэр дэвшигч­дээс хэн нэгэн нь олон­хийн санал авч чадахгүй бол тавдугаар сарын 28-нд хоёрдугаар шатны санал хураалт болох юм.