“Malaysia Airlines” компанийн Куала-Лумпур хотоос Бээжин рүү нисч байсан МН370 чиглэлийн “Боинг 777-200” онгоц энэ сарын 8-нд учир битүүлгээр сураггүй алга болоод одоо хэр олдоогүй байгаа билээ. Сүүлийн мэдээллээр тус онгоцыг Австралийн Перт хотоос 2500 км-ийн зайд Энэтхэгийн далайд осолдсон гэж үзэж байгаа юм. Цаг агаарын улмаас эрлийн ажиллагаа түр саатаад өнөөдрөөс дахин сэргэжээ.

Онгоцонд 227 хүн зорчиж явснаас дийлэнх нь буюу 154 нь манай урд хөршийн иргэд байсан юм. Тэдний ар гэрийнхэн болон сэтгэл нь зовнисон олон зуун хятад иргэн Бээжинд буй Малайзын ЭСЯ-ны өмнө жагсаал хийж замбараагүй байдал үүсгэсэн нь бий. Иймээс ч БНХАУ-ын удирдлага эрлийн ажиллагаанд Гадаад хэргийн дэд сайд Жан Есүйг илгээжээ.

Эрлийн ажиллагаанд Австрали, Шинэ Зеланд, БНХАУ, Япон, АНУ, БНСУ-ын цэргийн болон иргэний агаарын 12 онгоц, Австралийн тэнгисийн цэргийн “HMAS Success” болон БНХАУ-ын Өмнөд туйлыг судалдаг тусгай зориулалтын хөлөг онгоцууд оролцож байна.