Х.ОЮУНБОЛД Хэнтий аймгийн Батноров суманд “Талын түмэн адуу-2019” эвент тав дахь жилдээ ирэх сарын 1-3-нд болох талаар БОАЯЖ, Соёл урлагийн газар, “Мөнх харилцаа” ТББ-аас мэдээлэл хийлээ. Энэ үеэр “Мөнх харилцаа” ТББ-ын тэргүүн Э.Цэрэнбат “Энэ жил 21 аймгийн адуучид ирж оролцож байгаа нь эвентийн онцлох үйл явдал болж байна. Мөн зохион байгуулалтын арга хэмжээ нэлээн өргөссөн байгаа. Тодруулбал,БОАЯЖ, Засгийн газрын хэрэгжүүлэгч агентлаг Соёл, урлагийн газар гэсэн дэмжигч 30 гаруй байгууллагын оролцоотойгоор 40 гаруй сая төгрөгийн төсөвтэйгөөр гурав хоногийн хугацаанд зохион байгуулна” гэв. Мөн Засгийн газрын хэрэгжүүлэгч агентлаг Соёл, урлагийн газрын мэргэжилтэн Х.Болормаа “Талын түмэн адуу-2019” эвентийг манай газраас  энэ жил дэмжин ажиллаж байна. Энэ эвентийг дэмжиж байгаагийн нэг шалтгаан нь монголчуудын ахуй амьдрал, нүүдлийн соёл ялангуяа, адуу дагасан  ёс заншлыг сурталчилсан соёлын том арга хэмжээ гэж үзэж байгаатай холбоотой юм” гэж ярилаа. Ирэх сарын эхээр болох энэ арга хэмжээнд бусад аймгийн биет бус өвийг өвлөсөн хүмүүс оролцохоор ирж байгаад манай байгууллагын зүгээс ач холбогдол өгч байгаа. Түүнээс гадна арга хэмжээг зохион байгуулагчидтай хамтраад Монголд алдартай уран дархны хийц бүтээлээс толилуулах үзэсгэлэнг гаргахаар ажиллаж байна гэв. Адуу дагасан өв соёл арга хэмжээний үеэр болох дээлтэй барилдаан, удамт монгол хүүхдийн морьтон жагсаал, сүлдэнд мөнхөрсөн хүлэг дуу дуулаач, гэрэл зургийн  уралдаанд зочид төлөөлөгчид оролцох боломжтой юм байна. Энэ арга хэмжээг зохион байгуулах нэг шалтгаан нь өмнө арваннэгдүгээр сард малчид, тал нутгийнхан адуугаа уургалдаг байсан соёлыг хадгалах, бүс нутгийн том арга хэмжээ болгох ялангуяа, Зүүн хойд Азийн аялал жуулчлалын урсгалд оруулахыг зорьж байгаагаа эвентийг зохион байгуулагчид онцолсон юм. Түүнээс гадна гурав хоног үргэлжлэх арга хэмжээнд оролцохыг хүссэн хүмүүсийг  фэйсбүүк цахим хуудаст нээсэн “Талын түмэн адуу-2019” пэйж хуудсаар холбогдож байрлах байраа захиалж, бүртгүүлж урьдчилан захиалгаа өгөхийг хүслээ. “Мөнх харилцаа” ТББ-ын тэргүүн Э.Цэрэнбат энэ арга хэмжээний үеэр зохион байгуулдаг гол арга хэмжээний нэг  “Сүлдэнд мөнхөрсөн хүлэг” дуу дуулаачийн уралдааны шагнал долоон сая төгрөг болсон байгаа. Тиймээс адууны тухай уртын болон богинын дуугаар тэмцээнд оролцоорой гэж байлаа. Эх сурвалж www.polit.mn