Д.Гэрэлцэцэг

Хятадын тэнгист осолдсон байж болзошгүй “БОИНГ 777-200” онгоцтой холбоотой гурван хэсэг томоохон зүйл хөвж яваа нь хиймэл дагуулын дуранд бичигдсэн талаар БНХАУ-ын Засгийн газрын албан ёсны цахим хуудаст мэдээлсэн байна. Өмнө нь олдож байсан зүйлс нь онгоцтой ямар ч холбоогүй байсан бол энэ удаагийнх холбоотой байх магадлал өндөр байгаа гэнэ. Тиймээс Вьетнам болон Малайзаас  эрлийг явуулах баг, онгоцнуудаа илгээсэн байна. БНХАУ-ын Засгийн газар эрлийн ажлыг дэмжиж холын зайнаас зураг сайн татах хүчин чадал бүхий хиймэл дагуулын станцуудыг ажиллуулж эхэлжээ.

Одоогийн байдлаар олдоод байгаа гурван хэсэг зүйлийн хамгийн жижиг нь 13х18, дараагийнх нь 14х19 хэмжээтэй аж. Харин хамгийн том нь 24х22-ын харьцаатай байгаа нь сураггүй болсон онгоцных байж болзошгүй гэж эрлийн баг үзэж байна. Учир нь сураггүй болсон онгоцны урт нь 64 метр орчим урт байсан аж. Иймд дээрх олдсон зүйлсийг мөн гэх магадлал нэмэгдэж байгаа юм. Үүний зэрэгцээ “БОИНГ 777-200” онгоц Малаккагийн хоолойг хөндлөн нисч Андаманы тэнгист хүрсэн байж болзошгүй гэнэ. Тиймээс Малайзын талаас Андаманы тэнгист эрэл хийх талаар Энэтхэг улсад хүсэлт гаргасан байна.