Энэ оны есдүгээр сард Сомалийн “Аль-Шабааб” террорист байгууллагын даалгавраар террористууд Кенийн “Вестгэйт” худалдааны төвд халдав. “Вестгэйт” худалдааны төв нь Израилийн хөрөнгө оруулагчдын хөрөнгөөр баригдаж, үйл ажиллагаагаа явуулж байдаг худалдааны төв юм. “Аль-Шабааб” террорист байгууллага нь Кенийн цэргийнхэн Сомалид терроризмыг дарах үйл ажиллагаанд оролцсоны хариу болгож тийнхүү Кенийн Найробид “Вестгэйт” рүү халдсан гэж өөрсдийнхөө дайралтыг тайлбарладаг билээ. Халдлагын уршгаар 70 орчим хүн амь насаа алдаж 200 гаруй хүн шархадсан гэж тооцогддог. 3-4 хоногийн турш үргэлжилсэн энэхүү террорист халдлага нь үргэлжилсэн цаг хугацааны хувьд, дайрагчдын үйл ажиллагааны зэрлэг балмад шинж чанарын хувьд, Кенийн цагдаа, цэргийнхэн террористуудтай тэмцэх ур чадвар туйлын муутай байсны хувьд, эцэст нь зарим байгууллагын тогтоосноор жинхэнэ дайрсан этгээдүүд зугтаж алга болсны хувьд бүх дэлхийн анхаарлыг татсан юм. Террористууд мусульман шашинтай хүмүүс байсан бөгөөд тэр нь тэд мөргөлийн цаг болоход мөргөл үйлдэж байсан гэдгээр батлагддаг билээ. Түүнчлэн террористууд “Вестгэйт” худалдааны төвд байсан хүмүүсийг исламын шашинтан ба исламын шашинтан бус хэмээн хоёр ялгаж, исламын шашинтнуудыг чөлөөлж байсан байдаг. Террористууд тухайн хүн үнэхээр исламын шашинтан мөн эсэхийг тогтоохын тулд тухайлбал түүнээс Магомед зөнч мэргэний ээжийн нэрийг асууж, тэр хүн зөв хариулвал исламын шашинтан мөн байна хэмээн үзэн чөлөөлж, хэрэв зөв хариулж чадахгүй бол газар дээр нь буудан амь насыг нь зэрлэг балмад аргаар хороож байжээ.

Кенийн цагдаа, цэргийнхэн хэд хэдэн удаа террорист халдлага дууссан, террористуудыг устгасан гэж зарлаж байсан боловч буудалцаан дахин дахин сэргэж байсан юм. Эцэст нь 70 орчим хүн нас барсан, 200 гаруй хүн шархадсан дүнтэйгээр энэхүү балмад халдлага дууссан юм.

Уг нь өмнө нь НҮБ болон бусад эх сурвалж Кенид террорист халдлага болох магадлал өндөр байгаа тухай мэдэгдэж байсан боловч Кенийн хүчний байгууллагынхан террорист халдлага болоход шуурхай арга хэмжээ авах бэлтгэл муутай байсан байна. Түүнчлэн Кенийн Найроби хотын “Вестгэйт” худалдааны төвд халдсан террористуудыг өмнө нь өөр террорист үйл ажиллагаанд оролцож байсан хүний эхнэр болох Саманта Льютвейт хэмээх нэртэй англи эмэгтэй удирдаж байсан гэсэн шуугиан дэгдсэн билээ. Энэ нь батлагдаагүй болно.

2013 оны дөрөвдүгээр сард Кенийн Ерөнхийлөгчөөр сонгогдсон Ухуру Кеньяатагийн дүү тэрхүү террорист халдлагын үед амь насаа алдсан юм. 2007 онд Кенид болсон Ерөнхийлөгчийн сонгуулийн дараа Ерөнхийлөгчийн сонгуульд өрсөлдсөн Кибаки ба Одинга сонгууль шударга бослон эсэх асуудлаар маргалдаж, тэднийг дэмжэгчдийн хооронд ширүүн тэмцэл өрнөсний улмаас 1300 орчим хүн амь насаа алдсан, 600000 гаруй хүн оршин сууж байсан газраа орхин нүүн шилжсэн байдаг. Тэр үед Кенийн одоогийн Ерөнхийлөгч Ухуру Кеньяата олон нийтийн үймээн самууныг уриалан дэгдээсэн хэргээр буруутгагдаж,  Олон улсын шүүхэд дуудагдсан байгаа билээ. Одоогоор шүүх хурал хойшлогдсон байгаа билээ. Террорист үйл ажиллагаа олон улсын хамгийн тулгамдсан асуудлуудын нэг хэвээр байгааг Кенийн Найроби хотын “Вестгэйт” худалдааны төвд халдсан халдлага дахин нотлон сануулсан билээ.