Н.МӨНХЖИН

Кубын экс лидер Фидель Кастро өнгөрсөн баасан гаригт буюу энэ сарын 13-нд Испанийн сэтгүүлч Игнасио Рамонетийг хүлээн авч уулзсан гэрэл зураг арлын хэвлэл мэдээллийн хэрэгслээр түгэв. Уулзалт Кубын хувьсгалын лидер, Венесуэлийн бурхан болсон Ерөнхийлөгч Уго Чавес нарын анхны уулзалтын 19 жилийн ойн өдөр Фидель Кастрогийн гэрт боллоо хэмээн Cubadebate цахим хуудаст мэдээлжээ. Сэтгүүлч Рамонет ч энэ тухай Facebook хуудсаараа уламжилсан байна.

Испани сэтгүүлч саяхан “Уго Чавес: Миний анхны амьдрал” ном гаргасан бөгөөд Фидель, Рамонет нар энэ номны талаар хоёр цагийн турш ярилцжээ. Спорт хувцас өмссөн Фидель Кастро ийнхүү ярилцан суугаа гэрэл зургийг олон нийтэд түгээжээ.

Эдүгээ 87 нас сүүдрийг зооглож байгаа Фидель Кастро 2006 онд хүнд өвчин тусч удирдагчийн үүргээсээ татгалзсан юм. 2008 онд дүү Раульдаа улс орны жолоог атгуулж, улс төрөөс зодог тайлжээ. Испани сэтгүүлч Рамонет Кубын экс удирдагчтай хэд хэдэн удаа уулзаж, ярилцсаны эцэст “Фидельтэй өнгөрүүлсэн 100 цаг” хэмээх ном гаргасан билээ. Фидель, Рамонет нар энэ удаа Венесуэлийн орон нутгийн сонгууль, өнөөгийн дэлхийн улс төрийн байдал, байгаль экологи зэрэг сэдвээр ярилцаж, санаа бодлоо солилцсон хэмээн Кубын хэвлэлд бичжээ. Харин Кубын хувьсгалын удирдагч ойр дотно нөхөрлөж явсан Өмнөд Африкийн лидер асан Нельсон Манделагийн талаар дурсан ярилцсан эсэхийг мэдээлсэнгүй. Арлын одоогийн удирдагч Рауль Кастро Манделад хүндэтгэл үзүүлэх уулзалтад оролцож, индэр дээрээс үг хэлж байсан билээ.

Ф.Кастро эрх мэдлээс бүрмөсөн холдсон “Эргэцүүлэл” бичиж албан ёсны “Гранма” сониноор дамжуулан нийтэлдэг болсон юм. Гэвч өнгөрсөн наймдугаар сараас хойш түүний “Эргэцүүлэл” нийтлэгдэхээ больсон нь янз бүрийн цуу яриа дэгдэхэд хүргэжээ. Кубын хувьсгалын удирдагчийн эрүүл мэнд сайн, тогтвортой байгааг түүний шинэхэн гэрэл зурганд дүгнэлт хийсэн мэргэжилтнүүд онцолсон байна.