Н.МӨНХЖИН

ОХУ, Кубын тал Гаванын эрх баригчид ЗХУ-ын үед тавьж байсан 29 тэрбум ам.долларын өрийг хүчингүй болгох тохиролцоонд гарын үсэг зурлаа. Энэ баримт бичгийг Төрийн Дум батлах ёстой. Дээрх тохиролцооны талаар аль аль тал нь тайлбар, мэдэгдэл хийсэнгүй. Куба улс 1980-аад оны сүүлчээр эдийн засгийн хүнд байдалд орсон юм. Сүүлийн үед тус улс олон улсын зах зээл дээр нэр хүндээ өсгөхийн тулд гадаад өр зээлээ эргэн харж, засварлах гэрээг хийхээр чармайж байна.

1990 онд ЗХУ Кубад үзүүлдэг тусламжаа зогсоосны дараа тус арлын эдийн засаг гэнэтийн хямралд орсон юм. ЗХУ Америк тив дэх стратегийн чухал түншдээ эдийн засгийн томоохон тусламж, дэмжлэгийг 30 гаруй жилийн турш үзүүлж ирсэн билээ. АНУ-ын хориг арга хэмжээнд орсон Куба аралд эдийн засгийн тусламж үзүүлж байсан бараг ганцхан улс ЗХУ байсан тул Куба улс тэр чигээрээ оросуудын тусламжаас ха­маарч байлаа. Гэвч 1980-аад оны сүүлчээр Европ даяар ардчилал, өөрч­лөн байгуулалтын салхи босч, улмаар ЗХУ задар­чээ. Ийнхүү зөвлөлт оросууд ахан дүүгийн барилдлагатай Куба улсад үзүүлдэг тусламжаа зогсоохоос аргагүй болсон юм.

Тэр цагаас хойш Фидель Кастро тэргүүтэй Кубын эрх баригчид эдийн засгаа хөл дээр нь босгох гэж ихээхэн хүчин чармайлт гаргаж ирсэн ч АНУ-ын хориг арга хэмжээ ихээхэн саад болсон хэвээр байна. Дэлхийн хамгийн том эдийн засаг зуун хэдхэн бээрийн зайтай хажууд нь байгаа ч Куба улс шууд худалдаа, наймаа хийж, эдийн засгийн харилцааг хөгжүүлэх боломжгүй, гуравдагч улстай худалдаа наймаа хийсэн ч нөгөө л хориг арга хэмжээний улмаас төлбөр тооцооны асуудалд хүндрэл учирдаг нь Кубын эдийн засгийн хөгжлийг боомилсоор байна.

2011 оны дөрөвдүгээр сард Фидель Кастро Кубын удирдлагыг дүү Раульдаа шилжүүлж өг­чээ. Рауль Кастро эдийн засгийн бодлогоо шинэ­чилнэ хэмээн зарлаж, газрыг тариачдад өгч, тариалсан ногоо, жимсээ зах зээл дээр чөлөөтэй борлуулах эрхийг олгожээ. Мөн аялал жуулчлалын салбарт хувийн секторыг дэмжих, оролцуулах зэрэг арга хэмжээ авч байгаа ч шинэчлэл хэтэрхий удаан, хүнд сурталтай хэвээр байна.