Их Британи, АНУ болон Францын талынхан өнгөрсөн сарын 21-нд болсон халдлагад Сирийн удирдлагууд химийн зэвсэг хэрэглэсэн гэж үзэж байсныг НҮБ шалгалтаараа баталлаа. Дамаск хотод болсон тус халдлагын үеэр “Зарин” нэртэй хорт утааг ашигласан нь шинжилгээгээр тодорхой болсон байна. Энэ тухай шинжээчдийн бэлтгэсэн тайланг өнгөрсөн даваа гаригт НҮБ-ын Аюулгүйн зөвлөлийн хаалттай хурлын үеэр тус байгууллагын тэргүүн Пан Ги Мүн танилцуулав.

НҮБ-ын ерөнхий нарийн бичгийн дарга Пан Ги Мүн химийн зэвсэг хэрэглэсэн явдлыг “Дайны гэмт хэрэг” гэжээ.  Өнгөрсөн долоо хоногт Женевт болсон хэлэлцээрийн үр дүнд АНУ болон ОХУ Сирийн химийн зэвсгийг олон улсын хяналтад авах тухай төлөвлөгөө боловсруулсан билээ. Хэлэлцээр ёсоор ирэх оны дунд үе хүртэл Сирийн химийн зэвсгийг устгах эсвэл тус улсын газар нутгаас гаргах ёстой аж. Хэлэлцээрийг нэлээн хэдэн орны удирдагчид дэмжсэн юм. Түнчлэн НҮБ-аас Сири улс химийн зэвсгийг хориглох тухай олон улсын конвенцид ирэх сарын 14-нд нэгдэнэ гэж мэдээлсэн.