Зохиолч яруу найрагч Н.Сүхдоржийн 2016 онд гаргасан “Насан хөсөг алсрахуй дор” номоос Япон улсад аялах үеэрээ бичсэн  уран бүтээлээс нь толилуулж байна.   Нэгэн бээр   Япон тэнгисийн эрэг дээр Явдал саатсан монгол эр Булингартай усыг нь ширтэж Буурал тэргүүнээ гудайлгана Хуйлрах догшин давалгаа Хубилай, Хубилай гэж үглэнэ...   Нэгэн бээр   Япон тэнгисийн эрэг дээр Япон бүсгүй зогсоод Япон дуу аялсан нь Бүлтэн үрээ энхрийлсэн Бүүвэйн дуу байлаа   Нэгэн бээр   Япон тэнгисийн хөвөөнөө Япон ханз шиг харагдах Өргөгч цамхагийн оройд Өрөвтас зүүрмэглэнэ суух нь Өвлийн өнгө санжээ.   Нэгэн бээр   Япон тэнгисийн эрэг дээр Ёрын хэрээ гуагчина Хар хэрээ ер нь Хаа сайгүй байх юм аа Сэтгэлд сүүдэр унагаж явах юм.   Нэгэн бээр   Япон тэнгисийн эрэг дээр Мандах нарыг харлаа Тэнгэрт нэг мандаж Тэнгист нэг хөвөх нь Япон тэнгисийн нар байлаа   Нэгэн бээр   Япон тэнгисйн мандал дээрх Явган саарал мананд төөрч Хээр хоносон ёлтгор саран Хэдэн бүдэг оддыг бараадан Хэц дэрлэн чичирч харагдана.   Нэгэн бээр   Япон тэнгисийн мандал нь Бүжингийн гүйдэл шиг сэлгээнэ Атираатан хээтэх нь жаргалтай юм аа Бүгэг саарал манан нөмрөн Амьсгаадан хөлбөрнө зовлонтой юм аа.   Нэгэн бээр   Япон тэнгисийн эрэг дээр Явдал дундаа танилцсан Дүүмэд бүсгүйн дүрлэн нүд Дүүрэн асуулттай дүрлийнэ Хариулт нь би бололтой   Нэгэн бээр   Давалгаалан шуугих тэнгисийн саарал манан дунд Дававчгүй хун шиг эргэлдэх ганц цагаан завь Өөдөө сөөргөө ч явсангүй далбилзан хөвж өнжсөн нь Өнөөх загасчны завь байх нь ээ Уулын гөрөөчний хүү надад Усны ангууч сонин санагдана. 2013.02.28