Х.ОЮУНБОЛД Нийгмийн даатгалын ерөнхий газар өчигдөр Хархорин захад “Явуулын үйлчилгээ”-ний нээлтээ хийж, нийгмийн даатгалын хууль тогтоомжийн зөвлөгөө мэдээлэл өгч, үйлчилгээ үзүүлэн, иргэдэд нээлттэй ажиллалаа. Нийгмийн даатгалын ерөнхий газрын дэд дарга Т.Батмөнх тус үйл ажиллагааг нээж хэлсэн үгэндээ “Нийгмийн даатгалын ерөнхий газраас энэ жилийг “Танд ойрхон найрсаг үйлчилгээний жил” болгож зарласан. Энэ ажлын хүрээнд иргэдэд хүргэх үйлчилгээг хялбаршуулж, шуурхай чанартай үйлчилгээ үзүүлэх зорилгоор олон ажил хэрэгжүүлж буйн нэг нь явуулын үйлчилгээ юм. Ингэснээр худалдааны төвүүд болон ажлын байрнаасаа гарч төрийн үйлчилгээ авч чаддаггүй хүмүүс цаг алдалгүй үйлчилгээ авах таатай нөхцөл бүрдэж байна,  Явуулын үйлчилгээ нь нийслэлд  долоо хоногийн хоёр өдөр бүх зах, худалдааны төвөөр явж ажиллах хуваарьтай байгаа. Харин хөдөө орон нутагт сард нэг удаа зохион байгуулж, малчны хотонд хүрч ажиллахаар төлөвлөсөн” гэв. Нийгмийн даатгалын байгууллагаас зохион байгуулж буй тус өдөрлөгийг олон хүн сонирхож, байцаагч нараас зөвлөгөө авч байлаа. Тэдний нэг “Хархорин” захын худалдаачин Д.Мижиддондов “Би хүний лангуун дээр сарын 400 мянгаар цалинжиж ажилладаг. Өглөөнөөс орой хүртэл ажилладаг хүмүүст Нийгмийн даатгалын газарт очиж мэдээлэл авах цаг байхгүй. Бидэн шиг хүмүүст зориулаад шинэ үйлчилгээг нэвтрүүлж байгаа нь зөв. Учир нь ард иргэдэд энэ талын мэдлэг чухал” гэв. Харин хувиараа бизнес эрхлэгч Б.Болормаа хэлэхдээ “Нийгмийн даатгалын талаар асууж сонирхлоо. Би хувиараа бизнес эрхэлдэг учир нийгмийн даатгалаар очиж үйлчлүүлэх завгүй байдаг. Тиймээс энэ үйлчилгээг олзуурхаж байна. Ямар нэгэн чирэгдэл учруулахгүйгээр иргэдэд хүрч ажиллах, мэдээ мэдээллээр хангах сайхан үйлчилгээг санаачилжээ” гэсэн юм. Малчны хот, худалдаачны лангуу, ажилтны ажлын байранд хүрч үйлчлэх “явуулын үйлчилгээ”-гээр сайн дурын даатгалын гэрээ байгуулах, шимтгэл төлөх, “Нийгмийн даатгал” аппликэйшний бүртгэлийг баталгаажуулах, хууль эрх зүйн зөвлөгөө болон нийгмийн даатгалын бүх төрлийн мэдээлэл авах боломжтой юм байна. Эх сурвалж: “Зууны мэдээ” сонин 2019.3.28 № 64 (6031)