2019 оны 2 сарын 5-ны өдөр.                                                           Улаанбаатар хот.

            Эрхэм хүндэт Монгол ахан дүүсээ, Амь нас, ухамсарт амьдралаа улс орноо хөгжүүлэх, үр хүүхдээ өсгөн хүмүүжүүлэх их үйл хэрэгт зориулсан азай бурлууд аа, Та бүхэн маань сар шинэдээ сайхан шинэлж байна уу? Цаг хугацаа улиран өнгөрч, та бид шороон нохой жилээ үдэж шороон гахай жилтэйгээ золгож байна. Жил бүр өөр өөрийн өнгө, засалтай байдаг ч эцэг эхээ хүндэтгэдэг, үр хүүхдийнхээ эрдэм мэдлэг, зөв хүмүүжлийн төлөө байнга санаа тавьдаг, бусдын зовлонгоос үүрэлцэн нимгэлдэг, өөрийн жаргалаас бусадтай хуваалцдаг ухамсарт хүн ямар ч жилийн өнгийг хичээнгүй хөдөлмөр зүтгэл, сэтгэлийн тэнхээгээрээ засч чаддаг билээ. Хэдийгээр өнгөрч байгаа жилийн ихэнхэд нь төр засаг хямарч ард түмнийхээ амьдралыг өөд нь татах үүргээ умартсан байдалтай байсан ч хур бороогоо харамгүй илгээж хүн зон, мал сүргийг баярлуулсан байгаль дэлхий, амьдралаа өөд нь татахын төлөө өдөр, шөнөгүй зүтгэсэн түмэн олны хүч хөдөлмөрийн ачаар өнгөрч буй шороон нохой жилийг улс орноороо амжилттай даван тууллаа. Монгол Улсын улс төр, нийгэм, эдийн засгийн хямралт байдал ард түмэнд маань ган зуднаас илүү хүндээр тусч байгааг та бүхэн надаар хэлүүлэлтгүй сайн мэдэж байгаа. Миний бие журмын нөхөд, эрдэмтэн мэргэд, жирийн иргэдийн хамт энэхүү хямралт байдлаас гарах хамгийн зөв гарц бол 27 жилийн турш үйлчилсэн, түүхэн үүргээ биелүүлсэн, өнөөгийн тулгамдсан асуудлуудыг шийдвэрлэхийн оронд улам гүнзгийрүүлэн ужигруулж байгаа Үндсэн хуулийг шинэ Дээд хуулиар өөрчлөн солих явдал мөн хэмээн үзэж, өнгөрч байгаа шороон нохой жилд шинэ Дээд хуулийн талаар ард түмэнтэйгээ санаа бодлоо хуваалцаж, саналыг нь авахаар өвөл зун, хавар намрын 4 улиралд 21 аймаг, 140 гаруй сум, Улаанбаатар хотын 9 дүүрэгт хүрч ажилласан бөгөөд энэ хугацаанд 40 орчим мянган километр урт замыг туулсан байна. Монгол хүн төр засгийн хамгаалалтанд байх, байгалийн баялгийг ард түмний дундын өмч болгох, энэ эх үүсвэрээс орж ирэх их хэмжээний орлогоор залуучуудын дээд боловсролыг төрөөс хариуцдаг болох, иргэдийн эмчилгээний зардлыг улсаас хариуцдаг болох, залуу гэр бүл, хөгжлийн бэрхшээлтэй иргэнтэй гэр бүл болон олон хүүхэдтэй гэр бүлд улсаас орон сууц үнэгүй олгодог байх, ажил хөдөлмөр эрхэлж буй хүн бүрт амьдралд нь хүрэлцэхүйц цалин олгохыг хуульчлан тогтоох зэрэг эдийн засаг, нийгмийн асуудлуудыг цогцоор нь шийдвэрлэснээр ядуурлыг бүрмөсөн арилгах, шүүгчдийг иргэд өөрсдөө сонгодог болох, хариуцлага алдсан парламентын гишүүнийг сонгогчдын саналаар эгүүлэн татдаг болох, ард түмний сонгосон Ерөнхийлөгч Засгийн газрыг толгойлон сонгогдохдоо амалсныгаа хэрэгжүүлдэг байх зарчмыг нэвтрүүлснээр шударга ёс болон хариуцлагын тогтолцоог тогтоох гэсэн эрхэм зорилго, оновчтой зохицуулалт бүхий шинэ Дээд хуулийг уулзсан хүн бүр талархан дэмжиж байгааг энэ сайхан өдөр баяртайгаар онцлон тэмдэглэж байна. Хамгийн гол нь иргэд маань олон жилийн турш байнгын хямралт байдалд байснаасаа үнэхээр залхаж, энэ байдлаас хурдан гарах гарцыг боддог, эрэн хайдаг болсныг сайшаан тэмдэглэж байна. Гарч байгаа шороон гахай жилд хямралаас гарч дээрх эрхэм зорилго, оновчтой зохицуулалтыг ажил хэрэг болгох нь зөв хэмээн үзэж байгаа хүн бүр шинэ Дээд хуулийг дэмжин саналаа өгөхийг уриалж байна. Ингэснээр та бид Цагаан сарын баярын өдрүүдэд нэг нэгэнтэйгээ уулзан золгохдоо хэлдэг “эрүүл саруул байх, эрдэм боловсролтой болох, эд хөрөнгөтэй болох”-ын ерөөлийн сайхан үгийг бодит амьдралдаа хэрэгжүүлж чадна. Ерөөлийн сайхан үг ердийн амьдралд шинэ Дээд хуулиар дамжин хэрэгжинэ шүү гэдгийг эзэн Чингисийн үр сад болсон монголчууддаа анхааруулан сануулж буйг мэргэн оюун ухаандаа болгооно уу. Шинэ Дээд хуулиа дэмжин батлах, үр шимийг нь хүртэх эзэд нь та бүхэн өөрсдөө юм шүү, Монгол ахан дүүсээ. Та бүхэн маань элгээрээ энх амгалан, төрлөөрөө төвшин сайхан, юу санасан есөн цагаан хүсэл тань сэтгэлчилэн бүтэхийн өлзийтэй ерөөлийг өөд өөд нь өргөн дэвшүүлье. Сар шинэдээ сайхан шинэлээрэй.