Т.САЙХАН УИХ-ын чуулганы нэгдсэн хуралдаан өнөөдөр /02.01/ нэлээд шуурхай хуралдаж, хэд хэдэн асуудлыг шийдэж чадлаа.  УИХ-ын даргаар Г.Занданшатарыг томилж, ЗТХ-ийн сайд Я.Содбаатарыг үүрэгт ажлаас нь чөлөөлж, БСШУС-ийн сайд Ц.Цогзолмааг огцрууллаа.  Тэгвэл хүлээгдэж байсан асуудлуудаас ТАЗ-ийн гишүүдийг асуудлыг хэлэлцэж томиллоо. Төрийн албаны зөвлөлийн орон тооны гишүүнээр Ерөнхийлөгчийн Тамгын газраас Б.Идэрчулууныг нэр дэвшүүлж буйг Ерөнхийлөгчийн Тамгын газрын дарга З.Энхболд танилцуулсан юм. Нэр дэвшигч Бадамцоогийн Идэрчулуун нь эрх зүйч мэргэжилтэй, хууль зүйн магистр зэрэгтэй, төрийн албанд 18 жил ажиллаж байгаа аж. Тэрбээр цэргийн тусгай шүүхэд нарийн бичгийн дарга, тогтоол гүйцэтгэгч, шүүгч, дүүргийн шүүхийн шүүгч, Төрийн албаны зөвлөлд шинжээч, ахлах шинжээчээр ажиллаж иржээ. Харин 2011-2013 онд Үндэсний аюулгүй байдлын зөвлөлийн референт, 2017 оноос тус зөвлөлийн Ажлын албаны дэд даргаар ажиллаж байгаа юм. “Төрийн албан хаагчийн төлөөллийг сонгон шалгаруулах комисс”-оос зохион байгуулсан сонгон шалгаруулалтад оролцон хамгийн өндөр оноо авч Төрийн албаны зөвлөлийн гишүүний шалгуурыг хангасан Д.Зүмбэрэллхам, Д.Баатарсайхан нарыг Төрийн албаны зөвлөлийн орон тооны гишүүнээр томилуулах саналыг танилцуулсан юм. Ингээд Төрийн албаны зөвлөлийн орон тооны гишүүнд нэр дэвшигч тус бүрээр санал хураалгахад УИХ-ын чуулганы хуралдаанд оролцсон гишүүдийн олонх нь дэмжив. Ийнхүү ТАЗ-ийн таван гишүүн бүрдэж, удахгүй дотроосоо ТАЗ-ийн даргыг сонгох юм.  Эх сурвалж:www.polit.mn