Монголын хүн амын дунд нас баралтын хоёр дахь том шалтгаан болсон хавдар өвчин аюулын харанга дэлдэж байна шүү гэсэн дохио сануулгыг өгч ХСҮТ, ХААН банк сан, МҮОНРТ хамтран “Хавдрын эсрэг үндэсний аян”-г зохион байгуулаад ес дэх жилтэйгээ золгож байна. Аяны хүрээнд жил бүрийн хоёрдугаар сарын 4-нд “Хавдартай тэмцэх дэлхийн өдөр”-ийг тэмдэглэдэг болсон. 2019-2021 оныг “Би хавдрын эсрэг үйлсийг дэмжинэ. Би энэ үйлст нэгдсэн” хэмээн уриалсан юм. Хорт хавдрын өвчлөл, нас баралтыг бууруулах, хавдаргүй ирээдүйг бүтээхэд хувь хүний хүсэл эрмэлзлэл, шийдвэр, манлайлал чухал нөлөөтэй болохыг дэлхий нийтэд анхааруулж, уриалсан байна. Энэ жилийн хавдартай тэмцэх дэлхийн өдөрт зориулан “Та хавдрыг даван туулагч” ил захидлыг ХСҮТ-ийн үйлчлүүлэгч, эмчлүүлэгчид гардуулах, хавдрын даван туулагчид, ХСҮТ-ийн сувилахуйн алба, сэргээн засах тусламж, үйлчилгээний алба, эмчилгээний хоол, шим тэжээлийн тасаг, резидент эмч нар оролцон үйлчлүүлэгчдэд зөвлөгөө, мэдээлэл өглөө. Өнгөрсөн онд “Хавдрын эсрэг үндэсний аян”-ы эмч, мэргэжилтнүүдийн баг ходоодны хорт хавдар хамгийн ихтэй Увс, Баян-Өлгий, Ховд аймагт ажиллан 5100 гаруй иргэнийг хавдраас урьдчилан сэргийлэх үзлэг, оношилгоонд хамруулсан байна. Мөн орон нутгийн эмч, мэргэжилтнүүдийг нарийн мэргэжлийн сургалтад хамруулах, сайн дурын идэвхтэн бэлтгэх сургалтад банкны ажилтнуудыг хамруулах, иргэдэд хорт хавдраас урьдчилан сэргийлэх мэдлэг мэдээллийг түгээх, эрт илрүүлгийн ач холбогдлыг таниулахад анхаарч ажиллажээ. Хавдар өвчнийг эрт үед нь илрүүлж чадвал бүрэн эмчлэгдэх боломжтой. Аяны үзлэг, оношилгоогоор хавдрын эхний шатандаа оношлогдон, цаг алдалгүй эмчилгээ хийлгэн эрүүл болсон хүн олон байгаа хэмээн ХСҮТ-ийн эмч нар ярьж байлаа. Эх сурвалж www.polit.mn