Ч.ҮЛ-ОЛДОХ Утга зохиолын салбарын 2019 оны Нобелийн шагналд манай улсаас хоёр зохиолчийн нэрийг дэвшүүлжээ. Нобелийн хороонд нэр дэвшигчийн материалыг хүргүүлэх сүүлийн хугацаа өчигдрөөр дуусгавар болсон бөгөөд ШУА-ийн Хэл, зохиолын хүрээлэнгийн захирал, доктор Г.Билгүүдэйгээс энэ талаар тодруулахад  зохиолч Д.Урианхай, Ч.Галсан нарын нэрийг  албан ёсоор дэвшүүлсэн гэлээ. Нобелийн шагналд зохиолчоо нэр дэвшүүлэх саналыг Шведийн Нобелийн хорооноос Шинжлэх ухааны академид ирүүлсэн юм. Дэлхийн нэр хүндтэй энэхүү шагналд  нэр дэвшигч нь эдүгээ уран бүтээлээ туурвиж байх гэсэн шалгууртай. Нөгөөтэйгүүр, нэр дэвшигчийн тоо, квот заагаагүй. Академийн хурлаас нэр дэвшүүлэх нь зүйтэй гэсэн шийдвэрийг гаргаж, анхан шатны байгууллага,  хороод руу Нобелийн хорооноос ирсэн бичгийг хүргүүлснийг хэвлэлүүд  өмнө нь мэдээлсэн. Манай улс зохиолчдын хоёр байгууллагатай бөгөөд  Монголын зохиолчдын эвлэлээс  нэрт соён гэгээрүүлэгч, зохиолч, яруу найрагч Д.Урианхайг, Монголын Үндэсний чөлөөт зохиолчдын холбооноос зохиолч Ч.Галсангийн  нэрийг  тус, тус дэвшүүлжээ. Ч.Галсан  монгол хэлээр 10, герман хэлээр 39 ном бичсэнээс монгол герман хоёр  хэлээс гадна англи, япон, хятад гээд 20-оод  хэлээр зохиол нь орчуулагджээ. Нэрт соён гэгээрүүлэгч, сэтгэгч, яруу найрагч Д.Урианхайн тухайд 2018 онд  Нобелийн “Утга зохиолын шагнал”-д нэр дэвшиж байсан билээ. Эх сурвалж: www.polit.mn