Битүүн бол тэр жилийн хамгийн сүүлийн өдөр. Энэ өдөр айл хэсэхийг цээрлэнэ. Айл хэссэн хүн тухайн  ондоо бас тэнүүчилнэ гэж үздэг. Энэ шөнө айлд хоновол сүнс төөрнө. Гэрийн эзэн гэртээ байх нь ямар нэг гай барцад тохиолдохоос сэрэмжилж, буян хишгээ тогтоож буй хэрэг ажээ. Битүүний өдөр нохой зодохыг цээрлэдэг. Зодвоос шинэ ондоо гай гамшиг тохиолдоно гэж үздэг ажээ. Харин цадтал нь хоолло. Юм идэж гадаа гарахыг цээрлэнэ. Газарт бохир ус асгаж болохгүй. Эс тэгвэл чөтгөр ам долоож, яр шарханд баригдана гэж цээрлэдэг ажээ. Гэр харанхуй байх, гадаа хувцас хонуулах, нялх хүүхдийг нэрээр нь дуудахыг цээрлэнэ. Учир нь чөтгөр хорлоно хэмээдэг ажээ. Өлсгөлөн хонохыг цээрлэнэ. Энэ нь гарч буй жилд нийтээрээ өлсөхийн ёр юм байна. Тиймээс хоол ундаа цадталаа тохируулан хэрэглэ. Гэртээ хэл ам, хэрүүл шуугиан хийж, өндөр дуугаар чанга ярихыг цээрлэнэ. Эс дагаваас шинэ ондоо хэрүүл тасрахгүй. Айл гэр, улс орон амар тайван бус байна гэж цээрлэдэг заншилтай.