Т.САЙХАН Эрх баригч намын бүлэг өчигдөр /01.31/ орой 20.00 цагийн үед хуралдлаа.  Удирдах зөвлөлөөс УИХ-ын даргад ЗГХЭГ-ын дарга Г.Занданшатарын нэрийг оруулж ирсэн.  Энэ асуудлыг хэлэлцээд бүлгийн гишүүд 100 хувь дэмжсэн байна.   МАН өнөөдөр УИХ-д 64 суудалтай.  Удахгүй 2020 оны сонгуульд болж тэд ард түмнээрээ дүнгээ тавиулна.  Тэгвэл өнгөрсөн хугацаанд МАН-ын талцал хэрүүл өндрөө авч, бүлэг албан ёсоор хоёр хуваагдаж, дотооддоо хэд хэд бүлэг фракци бий болсон байдаг.  Тэгвэл өчигдрийн бүлгийн хурал нэлээд эв түнжинтэй болсон гэх.  Г.Занданшатарын нэрийг энэ удаа УИХ-ын даргад оруулж ирсэн нь аль аль талдаа таалагдсан дундын хувилбар болсон бололтой.   Хэрэв 1950-аад оны төлөөлөл, аль эсвэл залуу үеэс энэ суудалд зүтгүүлсэн бол энэ намын хувь заяа бараг л хагараад дуусах магадлалтай байлаа. Бүлгийн хуралдааны эхэнд МАН-ын бүлгийн гишүүд босч, Уул уурхайн сайд асан Ц.Дашдоржийн дурсгалд хүндэтгэл үзүүлжээ.  Түүний дараа гишүүд Г.Занданшатарт хандан үгээ хэлсэн байна. Энэ суудалд суух хамгийн их магадлалтай өндөртэй байсан  Хууль зүй, дотоод хэргийн сайд Ц.Нямдорж С.Зориг агсны хэрэг,  Эрдэнэтийн асуудалд анхаарлаа хандуулахыг хүсээд мөн зангаа битгий хувиргаарай гэж захижээ.  Мөн хуралдааны үеэр УИХ-ын гишүүн Л.Оюун-Эрдэнэ “УИХ-ын дарга асан М.Энхболдоос албан ёсоор уучлал хүсч, өөрийн итгэл үнэмшлийн төлөө өнгөрсөн хоёр сар гаруй хугацаанд явж байхдаа муухай сэтгэгдэл төрүүлсэн бол уучлаарай, албан ёсоор танаас уучлал хүсч байна” хэмээсэн байна. Ерөнхий сайдын зүгээс дунд үеэ дэмжээд явахаа илэрхийлсэн учраас намын даргын санал болгосон хүнийг дэмжээд явна гэсэн байна.  Мөн  Ерөнхий сайдын зүгээс цаашид эвтэй байж, УИХ-ын даргад нэр дэвшигч Г.Занданшатарыгаа дэмжиж ажиллахыг намын нөхдөөсөө хүссэн байна.  Ийнхүү  М.Энхболдыг чөлөөлсний дараах МАН-ын хурал харьцангуй тайван болсон байна. Эх сурвалж:www.polit.mn