С.САРУУЛ МИАТ компани агаарын хөлгийн парк шинэчлэлийнхээ дагуу  “Боинг” болон “Аволон” компанитай гурван талт хэлцэл хийж дөрвөн  ширхэг “В737-8МАХ” буюу Тулуй агаарын хөлөгтэй болжээ. Шинэ агаарын хөлгүүдээ маргааш /2019.02.01/  Чингис хаан нисэх буудалд хүлээн авах юм байна. АНУ-д суугаа Элчин сайд Ё.Отгонбаяр АНУ-ын Сиатль хотод ажиллаж, МИАТ компанийн захиалгаар үйлдвэрлэсэн "Boeing 737 Max-8” загварын нисэх онгоцыг хүлээн авах арга хэмжээнд оролцжээ. Ингэснээр тус компани Монголдоо хамгийн залуу насжилттай агаарын хөлөг бүхий авиа компанийн нэг болж байгаа аж. Хамгийн сүүлийн үеийн технологиор тоноглогдсон “В737-8МАХ” агаарын хөлөг нь түлшний зарцуулалт бага, найдвартай байдал, зорчигчдод илүү тав тухтай, байгаль орчинд ээлтэй байдлаараа давуу талтай гэнэ. Мөн зорчигч өөрийн гар утас, таблетээрээ Wifi сүлжээ ашиглан агаарын хөлгийн үзвэрийн системтэй холбогдож Hollywood-ийн кино, үзвэрээс сонгон үзэх боломжтой. Эх сурвалж: www.polit.mn