УИХ-ын чуулганы  хуралдаан эхэллээ. Хуралдааныг УИХ-ын дэд дарга Л.Энх-Амгалан даргалж байна.  Хэлэлцэх асуудлуудтай холбоотойгоор гишүүд саналаа хэллээ.  Мөн Ерөнхийлөгчийн Тамгын газрын дарга З.Энхболд өнгөрсөн нэг жилийн хугацаанд Төрийн тэргүүний хийсэн ажлын тайланг танилцуулав. УИХ-ын гишүүн Х.Нямбаатар: -Сонгуулийн тухай хуулийг хэлэлцэх асуудалд оруулж ирэх талаар ярилцмаар байна. Нийслэлийн Баянзүрх дүүргийн иргэд өнөөдөр нутгийн өөрөө удирдах байгууллагад төлөөлөлгүй хоёр жил гаруй хугацаа өнгөрлөө. Сонгуулийн шат шатны байгууллагын сонгууль маргаангүй болгох, шүүхийн маргаан үүсгэхгүй байх хууль эрх зүйн орчныг бий болгомоор байна. УИХ-ын гишүүн Д.Тогтохсүрэн: -Засгийн газраас өргөн барьсан Ашигт малтмалын тухай хууль болон дагалдах хуулийн төслийг хэлэлцэхийг хойшлуулж өгөөч. Засгийн газар энэ асуудал дээрээ нэгдсэн байр суурьтай болоод оруулж ирмээр байгаа юм. Тиймээс хойшлуулах хэрэгтэй байна. УИХ-ын гишүүн Б.Пүрэвдорж: -Орон нутагт ажиллаж, иргэдтэйгээ уулзаад ирлээ. Иргэд малын хулгай гаарсан, энэ төрлийн гэмт хэрэг хийсэн хүн 10 хоногийн албадан хөдөлмөр эрхлээд өнгөрч байна. Малын хулгай бол бүлэг гэмт хэрэг бий болоод байна. Тиймээс яаралтай Засгийн газар энэ асуудлаар зохицуулалт хийх ёстой. Мөн Эрүүл мэндийн сайд дөнгөж төгссөн эмч нарыг орон нутагт ажиллах шийдвэр гарсан нь орон нутгийн иргэд туршлагагүй эмч нарын туулай болмооргүй байна гэдгээ дамжууллаа. Улс төрийн хэрүүл хэрээс хэтэрлээ, одоо энэ асуудлаа зогсоож өгөөч гэж захиж байна. УИХ-ын гишүүн Я.Санжмятав: -Ер нь бол сар шинийн өмнө хэрүүлгүй, ажлаа хийх нь зөв байх. “Эрдэнэт”-ийн асуудлаар шүүхийн шийдвэрүүд гарсны дараа УИХ хэлэлцэх нь боломжгүй болов уу. УИХ-ын дэд дарга Л.Энх-Амгалан: -Сонгуулийн хуулиудыг өргөн барихад бэлэн болсон байгаа. Х.Нямбаатар гишүүний хэлсэн асуудлыг Төрийн байгуулалтын байнгын хороо анхааралдаа аваарай. УИХ-аас “Эрдэнэт” үйлдвэрийн асуудлаар ажлын хэсэг байгуулсан, тэд ойрын хугацаанд  энэ асуудлыг хэлэлцэх байх. Ашигт малтмалын тухай хуульд нэмэлт өөрчлөлт оруулах тухай болон хамт өргөн мэдүүлсэн хуулийн төслүүдийг хэлэлцэх асуудлын жагсаалтаас хойшлуулах горимын саналаар санал хурааж, чуулганы хуралдаанд оролцсон гишүүдийн олонх дэмжлээ. Эх сурвалж:www.polit.mn