С.САРУУЛ Дорноговь аймгийн Зүүнбаян дахь Зэвсэгт хүчний 336 дугаар ангид цэргийн алба хааж байсан байлдагч амь насаа алдсан харамсалтай хэрэг гарсан. Үүнтэй холбоотойгоор ЗХЖШ-аас  Ажлын хэсэг ажиллаж байгаа бол   захирагч, хурандаа Д.Өлзийбаярыг  үүрэгт ажлаас нь чөлөөлжээ. Мөн захирагчийн I орлогч штабын дарга, дэд хурандаа З.Баярааг цэргийн албаны өдөр тутмын цагийн хуваарьт хяналт тавьж ажиллаагүй, албан тушаалын үүргээ хангалтгүй гүйцэтгэсэн тул албан тушаалаас нь чөлөөлсөн байна. Захирагч, хурандаа Д.Өлзийбаярын оронд хурандаа Л.Батболдыг, захирагчийн I орлогч штабын дарга, дэд хурандаа З.Баяраагийн оронд хошууч Н.Батсайхан нарыг томилсон бөгөөд ажлыг нь хүлээлцүүлэхээр ажлын хэсэг тус ангид ажиллаж байна. Мөн нас барсан хугацаат цэргийн албан хаагчийн ротын захирагч, ахлах дэслэгч А.Энхбаяр, дэд ахлагч Р.Ванчинхангаа нарыг албан тушаалаас нь чөлөөллөө. Одоогоор тэднийг хууль хяналтын байгууллага шалгаж байна. Цаашид тус ангийн зэвсэглэл техник хариуцсан орлогч, ар талын хангалт хариуцсан орлогч, батальоны захирагч нарт албан тушаалын хариуцлага тооцож чөлөөлөхөөр боллоо. Хугацаат цэрэг амиа алдсан асуудлаар Зэвсэгт хүчний жанжин штабаас “Гүйж чадахгүй байхад нь тухайн хариуцаж байсан ахлагч жагсаал гүйцэхгүй баашиллаа гээд цохисон асуудал байна. Үүнийг нуухгүй. Гэхдээ үхэлд хүргэсэн эсэхийг шүүх эмнэлгийн дүгнэлтээр тогтоох байх. Цохисон болохыг хажууд байсан цэргүүдийн яриагаар нотолсон” гэж тайлбарласан. Харин хохирогчийн өмгөөлөгчид “Талийгаачийг өөрөө гүйж явахдаа бахардаж унасан гэсэн асуудлыг ярьж байгаа. Гэвч бахардаад унахад нь ахлагч нь өшиглөж харгисаар зодсон тухай хамт гүйж байсан цэргүүд нь гэрчилсэн” гэж мэдээлэл хийж байсан юм. Эх сурвалж: www.polit.mn