Т.САЙХАН Дорноговь аймгийн Зүүнбаян дахь 336 дугаар ангид байлдагч амиа алдсан харамсалтай хэрэг гарсан. Уг хэрэгтэй холбоотойгоор  ЗХЖШ-аас тухайн ангид ажлын хэсэг томилж хяналт шалгалт хийсэн бөгөөд  мэдээлэл хийлээ.  Бригадын генерал Б.Амгаланбаатар "Тухайн өдөр салбарын ахлагч нар салбарын захирагч нарын үүргийн дагуу салбарын байрны үзлэг хийсэн. Энэ үзлэгийн явцад эмх замбараагүй эд зүйлс, гар утас зэргийг салбарын байрнаас олсон байна. Ингээд салбарын захирагч эмх замбараагүй байна, дотоод журмыг зөрчиж, гар утас ашиглаж ярьсан байна гээд нийт цэргийн албан хаагчдад арга хэмжээ авах үүргийг салбарын ахлагчид өгсөн байгаа юм. Салбарын ахлагч цэргүүдийг авч гараад биеийн тамирын талбай дээр гүйлгэсэн. Гүйж байх явцад талийгаачийн биеийн байдал муудаж, би гүйж чадахгүй нь гэх тайлбарыг өгсөн байна лээ. Байлдагчийн бие дахин муудсан тул оронд нь оруулж хэвтүүлсэн байна. Мөн хажууд нь байсан албан хаагчид гар хөлөнд нь массаж хийж, эмнэлгийн анхан шатны тусламж үзүүлэх гэж оролдсон байна лээ. Ингээд хугацаат цэргийн албан хаагчид дараагийн  хичээлд орсон. Энэ явцад талийгаач таталт өгч, ангийн эмч сувилагч нарыг дуудахад, талийгаач ухаан алдсан байдалтай байсныг очсон сувилагч эмчдээ илтгээд Зүүнбаянгийн багийн эмч рүү авч явсан шийдвэр гаргасан. Багийн эмч хүлээн авч үзээд нас барсан зүрх нь зогссон байсныг тогтоосон. Ингээд Зүүнбаянгийн цагдаагийн хэлтэст мэдэгдсэн. Мөн Дорноговь аймгийн цагдаагийн хэлтсээс ажлын бүрэлдэхүүн дуудсан. Ажлын бүрэлдэхүүн газар дээр нь ажилласан. Манай байгууллагаас ар гэртэй холбоо барьж, болсон явдлыг дуулгасан. Ингээд ар гэрийнхэн нь ирээд хууль хяналтын байгууллага, ангийн удирдлагуудтай уулзсан гэлээ.  ЗХЖШ-аас томилсон ажлын хэсэг Нэгдүгээрт, ангийн удирдлагаас өдөр тутмын үйл ажиллагаанд тавих хяналт сул байсан. Хоёрдугаарт, салбарын захирагч шийдвэр гаргахдаа цэргийн сахилгын дүрмийг зөрчсөн. Сахилгын дүрмийн 62 дугаар заалтад цэргийн албан хаагчид сахилгын шийтгэл оногдуулахдаа нэр төрийг нь гутаан доромжлох, зүй бус харьцах, харгис авирлах, шийтгэлийг хавтгайруулан оногдуулахыг хориглоно гэснийг зөрчсөн байна. Гуравдугаарт, эмнэлгийн анхан тусламжийг хожимдож, үзүүлсэн байна гэсэн үндэслэлийг тогтоожээ. Эх сурвалж:www.polit.mn