Ч.Зотол ЗТХЯ-ны байранд гарсан хүн амины хэргийн шүүх хурал олон нийтийн анхаарлын төвд байна. Өнөөдөр тус хэрэгт мөрдөн шалгагдаж буй ЗТХЯ-ны газрын дарга асан Б.Махбалд холбогдох хэргийн урьдчилсан хэлэлцүүлэг Сүхбаатар дүүргийн Эрүүгийн хэргийн анхан шатны шүүхэд товлогдсон ч хойшлогдлоо. Шүүх хуралд оролцох ёстой байсан нэг шүүгчийн эрүүл мэндийн байдал муу байгаа тул хурлыг долоо хоногоор хойшлуулсан гэв. БЗД-ийн Эрүүгийн хэргийн анхан шатны шүүхээс "Нийслэлийн прокурорын газраас яллагдагч Б.Махбалд холбогдуулан яллах дүгнэлт үйлдэж ирүүлсэн эрүүгийн хэргийг Сүхбаатар дүүргийн Эрүүгийн хэргийн анхан шатны шүүх хүлээн авч талуудаас гаргасан хүсэлтийн дагуу урьдчилсан хэлэлцүүлгийн товыг тогтоон энэ сарын 18-ны 10 цагт хэлэлцэхээр зарласан боловч Эрүүгийн хэрэг хянан шийдвэрлэх тухай хуульд заасан шүүх хуралдааныг хойшлуулах хүндэтгэн үзэх шалтгаан бий болсон тул яллагдагч Б.Махбалдад холбогдох эрүүгийн хэргийн шүүхийн урьдчилсан хэлэлцүүлгийг энэ сарын 25-ны 11 цаг хүртэл хойшлууллаа" гэсэн тайлбарыг өглөө. Хэргийг нэхэн сануулахад: Б.Махбал нь ЗТХЯ-ны Төрийн захиргаа удирдлагын газрын даргаар ажиллаж байгаад ЗТХЯ-ны Хяналт, шинжилгээ, үнэлгээ, дотоод аудитын газрын дарга Т.Гомбосүрэнгийн амийг хөнөөсөн гэх хэрэгт буруутгагдан шалгагдаж байгаа юм. Энэ хэрэг 2018 оны наймдугаар сарын 9-нөөс 10-нд шилжих шөнө ЗТХЯ-ны байранд гарсан байдаг. Гэмт хэрэг гарсан тухай дуудлагын дагуу Сүхбаатар дүүргийн Цагдаагийн I хэлтсийн жижүүрийн бүрэлдэхүүн газар дээр нь үзлэг шалгалт хийх явцад Төрийн захиргаа удирдлагын газрын дарга Б.Махбал талийгаачийн амь насанд халдсан болохыг урьдчилсан байдлаар тогтоосон байдаг. Мөрдөн байцаалтын ажиллагаа дууссанаар хэргийг шүүхэд шилжүүлж, урьдчилсан хэлэлцүүлгийн шүүх хурал товлогдсон ч ийнхүү долоо хоногоор хойшиллоо. Талийгаачийн ар гэрээс хэрэг дээр ажиллаж буй холбогдох албаныхан баримт материалыг үнэн зөвөөр бүрдүүлээгүй, хөнгөн ял шийтгэл ногдуулах гэж улайрч байна гэсэн мэдэгдлийг хоёр ч удаа хийж байв. Талийгаачийн аав энэ байдалд бухимдаж, дээр нь хүүгээ алдсан сэтгэлийн шаналал, хүнд өвчнөө даалгүй нас барсан бөгөөд 49 хоноьг нь хараахан дуусаагүй байна. Эх сурвалж: www.polit.mn