Ч.ЗОТОЛ Хотын даргын томилгоог хэлэлцэх НИТХ-ын VI хуралдаан түр завсарлаад байна. Хуралдааны эхэнд С.Амарсайханыг Хотын даргаар томилуулах МАН-ын Удирдах зөвлөлийн тогтоолыг уншиж танилцуулсныг  НИТХ-ын төлөөлөгч Э.Бат-Үүл шүүмжилсэн юм. Тэрээр  “Үндсэн хуулийн эсрэг зүйл боллоо. МАН-ын Удирдах зөвлөл нь Иргэдийн төлөөлөгчийн байгууллага биш. НИТХ-ын ширээний араас  МАН-ын тогтоол уншдаг нь юу болж байна вэ. Энэ хурал хууль зөрчөөд байна. Удирдах зөвлөл ИТХ-д ямар хамаатай юм. Та нар хэзээ төрийн ажил ярьдаг болох вэ” гэсэн юм. Үүний дараа хурлын заалнаас НИТХ-ын төлөөлөгч С.Мөнхчулуун босч үг хэлсэн. Тэрээр  “Нийслэлийн засаг даргад өөрийн нэрээ дэвшүүлж байна. Ангийн нөхөд минь дэмжиж  өгнө үү” гэв. Түүний хувьд  инженер мэргэжилтэй, төрийн удирдлагын магистр,  одоо доктор хамгаалахаар  сурч байгаа. Докторын ажлын болон судалгааны сэдэв нь    “Нийгмийн дундаж давхаргын төлөв байдал”  гэсэн сэдэвтэй юм.  Тэрээр төр захиргааны байгууллагад ажиллаж ирсэн туршлагатай.  2009 оноос Нийслэлийн өмчийн харилцааны газар ажиллаж эхэлсэн,  Нийслэлийн МАН-ын гишүүн, Бага хурлын гишүүн, НИТХ-ын  тэргүүлэгч,  төлөөлөгчөөр  иржээ. НИТХ-ын төлөөлөгч Р.Дагва “Өчигдөр МАН-ын бүлэг хуралдаад шийдвэр гарсан. С.Мөнхчулуун өөрийн нэрээ дэвшүүллээ. Түүнийг нэр дэвшсэнтэй нь холбогдуулаад  30 минутын завсарлага авахыг хүсч байна" гэснээр хуралдаан завсарлаад байна. Эх сурвалж: www.polit.mn