Э.Өнөр

“Буянт-Ухаа 1” хорооллын орон сууцанд иргэдээс захиалга авах журам”-д нэмэлт өөрчлөлт оруулжээ. Уг журмын 6.5-д “Хэрэв орон сууц худалдан авсан этгээд нь орон сууцны үлдэгдэл төлбөрийг төлөхөөр банк, банк бус санхүүгийн байгууллагаас ипотекийн зээл авах тохиолдолд зээлийн гэрээний үүргийн гүйцэтгэлийг барьцаа хөрөнгөөр хангуулах тохиолдолд журмын 4.3, 6.4 дүгээр заалтууд хүчингүй болно” гэж өөрчилсөн байна. Өөрөөр хэлбэл,  “Орон сууц худалдан авсан этгээд нь худалдан авсан байрыг 15 жилийн хугацаанд бусдад худалдахгүй, ашиг олох зорилгоор түрээслэхгүй байна” гэсэн заалт хүчингүй болжээ. Мөн “Хэрэв худалдан авагч энэхүү журмын 4.3-д заасан хугацаанаас өмнө орон сууцаа худалдах бол ТОСК-ийн зах зээлд нийлүүлж байгаа орон сууцны тухайн үеийн нэгж кв.метрийн үнэ ханшаар зөвхөн ТОСК-д буцаан худалдана” гэсэн заалтыг хэрэгсэхгүй болгожээ. Ингэснээр уг хорооллоос банкны зээлээр байр авчсан иргэд байраа түрээсэлж, худалдах эрхтэй болж байгаа аж. Сугалаагаар тус хороололд 1540 иргэн байр худалдан авах эрх хожсон. Үүнээс 39 иргэн байрны үнийн 30 хүртэл хувийн төлбөрийг төлж, 913 иргэн 30 хувийн урьдчилгааг төлж захиалгын гэрээ байгуулжээ. Мөн зургаан иргэн 100 хувь төлбөрөө төлж, байрны түлхүүр авах нөхцлөө бүрдүүлсэн байна. Захиалгын дүнгээс харахад захиалга өгсөн иргэдийн дийлэнх нь байрны үлдэгдэл 70 хувийн төлбөрийг орон сууцны найман хувийн зээл авч төлөхөөр төлөвлөсөн байна.

Эх сурвалж: www.Polit.mn