Ч.Олдох Сүхбаатар аймгийн Эрдэнэцагаан сумын нутаг уул уурхайн хайгуулын болон ашиглалтын 33 линцензэд эзлэгдэж, байгаль орчин доройтсоноос мал, амьтан байтугай иргэд нь амьдрах аргагүй болж байгаа талаар  “Зууны мэдээ” сонин өнгөрсөн тавдугаар сард мэдээлсэн билээ. Тухайн үед сум, орон нутгийн  удирдлагууд иргэдийнхээ үгийг сонсдоггүй, уул уурхайнханы нөлөөнд орсон, тус тойргоос сонгогдсон УИХ-ын гишүүн Ч.Улаан намынхаа гишүүдтэй уулзчихаад явчихдгаас малчдын амьдрал, нөхцөл байдлыг тоодоггүй гэсэн шүүмжлэлийг эрдэнэцагаанчууд хэлж байв. Энэ байдал даамжирч, арга мухардсан нутгийн иргэд, малчид “Босоо Хөх Монгол” нийгэмд үйлчлэх төрийн бус байгууллагынханд ханджээ. Өөрөөр хэлбэл, өнгөрсөн зургаан сарын хугацаанд нутгийн иргэд  байгаль орчны газар, мэргэжлийн хяналт, орон нутгийнхаа  шат шатны удирдлагад хандаад тусыг эс олсон учир ийнхүү ТББ-уудаас тусламж хүсчээ. “Босоо Хөх Монгол” НҮТББ энэ сарын 5-6-нд  иргэдийн хүсэлтээр Сүхбаатар аймгийн Эрдэнэцагаан суманд очиж нөхцөл байдалтай газар дээр нь танилцсан тухайгаа “Үндэсний мэдээллийн төв”-д хэвлэлийн хурал зарлаж  мэдээллээ. “Босоо Хөх Монгол” НҮТББ-ынхан Эрдэнэцагаан  сумын III багийн нутаг оршдог тахилгат Баянцагаан хайрхны ард Хамар булаг гэдэг газарт жонш олборлож байсан  “АДАЭ” хэмээх Хятадын хөрөнгө оруулалттай компани болон хайгуулын өрөмдлөг хийж байсан хоёр ч аж ахуй нэгжийн үйл ажиллагааг  зогсоосон. Тухайн газрууд эсэргүүцэл үзүүлээгүй гэдгийг хэлллээ. “АДАЭ” компани нь  багийн иргэд нийтийн саналыг аваагүй, хурлыг хууль бусаар зохион байгуулсан, бичиг баримтыг хуурамчаар бүрдүүлсэн зэрэг зөрчил өмнө нь илэрч байсан юм. Тус ТББ-ынхан үүний дараа Эрдэнэцагаан сумын  VII багийн нутаг Тарган талд  газрын тос олборлох бэлтгэлээ хангаж буй Хятадын 100 хувийн хөрөнгө оруулалттай  “Макс  Ойл” компанийн үйл ажиллагаатай танилцсан байна.Энэ хавийн газар нь  бүхэлдээ хилийн хориотой бүс бөгөөд дархан цаазат газар, дээр нь  “Улаан ном”-д орсон хар сүүлт, халиун буга болон зээр гөрөөсний идээшсэн нутаг. Эртнээс нааш цас зудтай цаг хүндэрсэн үед нутгийн малчид тийшээ орж хүн, мал эсэн мэнд өвөлждөг  байсан газар юм. Гэтэл  тус газрыг   “Петро Чайна Дачин Тамсаг” компанийн  Ар булагийн 29 дүгээр талбай хэмээн нэрлэж, БНХАУ-ын “Датун” ХХК хайгуул, өрөмдлөгийн  үйл ажиллагаа явуулж буй юм. Эх орны өмнөд хилийн бүст  ийнхүү хайгуул, ашиглалтын ажил явагдаж,  хилийн тор зарим хэсгээрээ тасарсан  байдалтай тухайн  газарт өрөмдлөг явуулж байна. Иймд  улс орны аюулгүй байдал, төрөлх нутагтаа заяагдмал эрхээ эдэлж чадахгүйд хүрч, хүн ард нь мал амьтан, өвс ургамал, газар нутагтайгаа сүйрлийн ирмэгт элэг эмтрэм байдалд очоод буйг ҮАБЗ, Ерөнхийлөгч, Ерөнхий сайдад уламжилж, шаардлага хүргүүлнэ гэлээ.