Б.ЭНХ

Зэвсэгт хүчний жанжин штабын Агаарын довтолгооноос хамгаалах цэргийн командлагч асан, бригадын генерал Т.Дашдэлэг нарын гурван хүнд холбогдох хэргийг Улсын Дээд шүүхийн хяналтын шатны эрүүгийн хэргийн шүүхээр хянан хэлэлцлээ. Т.Дашдэлэг нар 2011 онд цэргийн ангид ашиглаж байсан байлдааны сөнөөгч бөмбөгдөгч “Миг-21” онгоцыг хуваан, их биеийг нь төмөр хайлуулах үйлдвэрт тушаасан, мөн моторыг нь БНАСАУ-д худалдахыг завдсан байж болзошгүй хэрэгт буруутгасан юм. Дүүргийн эрүүгийн хэргийн анхан шатны нэгдүгээр шүүх уг хэргийг өнгөрсөн нэгдүгээр сарын 6-ны өдөр хэлэлцээд Т.Дашдэлэгийг төрийн албан тушаалтан эрх мэдлээ хэтрүүлэх гэмт хэрэг үйлдсэн гэм буруутай хэмээн тооцож, жирийн дэглэмтэй хорих ангид гурван жил таван сар хорих ял оногдуулсан. Мөн Ж.Бямбаноров, М.Сэргэлэнбаатар нарыг бусдын эд хөрөнгийг завшиж үрэгдүүлсэн, төрийн албан тушаалтан эрх мэдлээ хэтрүүлэх гэмт хэргийг үйлдсэн гэм буруутай хэмээн үзэж, Ж.Бямбаноровт долоон жил нэг сар, М.Сэргэлэнбаатарт таван жил нэг сарын хорих ялыг жирийн дэглэмтэй хорих ангид эдлүүлэхээр  шийдвэрлэсэн юм. Давж заалдах шатны шүүх өнгөрсөн дөрөвдүгээр сард болж өмнөх шатны шүүхийн шийдвэрийг хэвээр үлдээсэн юм.  Харин энэ удаад Улсын Дээд шүүхээс анхан болон давж заалдах шатны шүүхийн шийдвэрийг хэвээр үлдээлээ.

Эх сурвалж:polit.mn