Ч.Зотол  

УИХ-ын гишүүн асан Г.Занданшатар  АНУ-д энэ сарын 10-нд автомашины осолд орсон тухай мэдээлэлд монголчууд эмзэглэж байна. Харийн оронд монгол хүний эрх зөчигдсөнд харамссан мэдэгдэл, сэтгэгдлүүд ч цахим ертөнцөд гарсаар байгаа юм. Тэгвэл  Г.Занданшатарын биеийн байдал  тун хүнд байгааг намын нөхөд нь ярилаа. Түүний  хөл тулгуур эрхтэний яс хугарсан, цээж, толгой  хэсэгтээ нэлээд хүнд гэмтсэн гэсэн мэдээлэл өгч байна. Мөн тархины мэс засал амжилттай болсон ч хараахан ухаан ороогүй байгаа гэлээ.

Г.Занданшатар  өнгөрсөн намар болсон МАН-ын  27 дугаар их хурлаар Ерөнхий нарийн бичгийн даргын ажлаа хүлээлгэж өгснөөс хойш АНУ-ыг зорьсон. Сан-Франциско хотноо олон улсын харилцааны чиглэлээр доктор хамгаалахаар суралцаж байсан. Энэ сарын 10-нд явган хүний гарцаар гарч явахдаа осолд орсон. Тухай үед ногоон гэрэл асч байсан бөгөөд түүнтэй хамт хоёр ч хүн осолд өртсөн мэдээлэл байна. Гурван хүнийг гэмтээж бэртээсэн жолооч цагдаад хөөгдөж явахдаа дээрх хэргийг хийсэн хэмээн цахим хуудаст тэмдэглэжээ. Мөн жолооч хар тамхи хэрэглэсэн байсан гэсэн мэдээлэл ч бас цацагдсан байна.