Ж.ХАТАНБААТАР

Иргэн бүр газартай болж, газрыг эдийн засгийн  эргэлтэнд оруулна, хүн бүр өмч хөрөнгөтэй болно гэсэн тархи угаалтын цаана Монгол нутгийн үржил шимт, арвин баялагтай газруудыг дуудлага худалдаагаар гадаадынханд зарж, өмчлүүлэхээр хуульчилж байна хэмээн өчигдөр Чингисийн талбайд иргэд тайван жагсаал хийлээ.  Энэ хууль батлагдаж газар хувьчилснаар Оюутолгойн ордыг доод  газартай нь хамт гадныхан үүрд өмчлөн авах болно. Цаашлаад алт, зэс, нүүрс, мөнгө,  нефть, занарын ордуудыг газартай нь гадаадынхан хувьчилан авч дураараа ашиглах болно.  Үүнийгээ Ашигт малтмал ашиглах зориулалтай газар хэмээн шинэ хуулийн төсөлд тусгайлан заасан, түүнчлэн ундны цэвэр усны сангуудыг хувьчилан авсан хүмүүсээс уух усаа бид өндөр үнээр худалдан авч эцэстээ монголчууд бид хамгийн үржил шимгүй, амьдралгүй газруудад аргагүй эрхэнд шахагдан гэрээ барьж, малаа ч бэлчээх нутаггүй болох хувь заяа хүлээж байна. Цөөн боловч олноос дутахгүй гэсэн Их хааныхаа үгийг уриа болгон өөрсдийгөө чадахгүй цөөн гэж голж, шалтгаан тоочиж, өөрсдийн амиа бодолгүй нийтийн эрх ашгийн төлөө үндэсний аюулгүй байдал, тусгаар тогтнолыг  үгүй хийх  хуулийн эсрэг нэгдэе хэмээн жагсаж байгаа аж. Уг жагсаалыг зохион байгуулж удирдсан  хүн байхгүй бөгөөд иргэдийн сайн дурын нэгдэл юм байна.