Докторант З.БАТТОГТОХ

Нэмэлт бүтээгдэ­хүүний сурталчилгаа хаа сайгүй.  Ном, сонин,  сэтгүүл, телевизээр гээд л хаанаас л бол хаанаас мэ­дээлэл авч болно. “Долоо хоногийн дотор ингэж тураана, тэгж тураана” гээд томдсон өмд өмссөн хөөрхөн бүсгүйчүүд, бү­дүүн эрийн хоёр сарын дотор хэрхэн Холливудын киноны гол баатар шиг болсныг харуулсан зур­гууд.  Үүнд та үнэмшдэг үү.

Таны эргэн тойрон дахь хүмүүсээс нэмэлт бүтээгдэхүүн хэрэглэн хоёр долоо хоногийн дотор 10 кг хасаад түүнийгээ барьж чадсан хүн хэр олон байдаг бол гэдгийг та анзаарч байсан уу.

 Жин хасна гэдэг шинжлэх ухаан. Түүнээс ид шид биш. Дор хаяж нэг жил уйгагүй хөдөлмөрлөж байж сурталчилгааны хуудас дээр байгаа зураг шиг өөрчлөлт гардаг. Цаг хугацаатай холбоотой энэ хүчин зүйлээс гадна нэмэлт бүтээгдэхүүнүүд үнэхээр эрүүл мэндэд хор хөнөөлгүй, аюулгүй юу гэдэгт өгөх баталгаа байхгүй.

Бидний ууж, идэж байгаа  хоол хүнс, эм тан бүгд элэг, бөөрөөр дамжин цэ­вэрлэгдэж байдаг. Ингэж бидний дотор “цэ­вэр­л­эх байгууламж” ажил­лаж байдгийн ачаар бие организм хорт бо­ди­соос хамгаалдаг юм. Гэтэл хүмүүс эм,  эмийн бүтээгдэхүүнүүдийн ха­рил­цан үйлчлэлийн хор нөлөөг бодолцолгүй олон янзын нэмэлт бү­тээг­дэхүүнийг холин хэ­рэг­лэдэг.  Нэмэлт бүтээг­дэ­хүүний замбараагүй хэрэглээ нь элэгний өвч­лөлийн 20 хувийг үүсгэж байна гэдэг судалгаа ч байна.

Нэмэлт бүтээгдэхүүн нь хүнс эсвэл эмийн зүйл ангийн алинд нь ордоггүй гэдгийг нэг их  тод ярь­даггүй. Өөрөөр хэлбэл, түүнийг яаж ангилахаа мэдэхгүй орхисон, завсрын бүтээгдэхүүн гэж хэлж болно. Тий­мээс энэхүү завсрын бүтээг­дэхүүн нь эцэстээ сая сая долларын хөрөнгө эр­гэлдэж байдаг хяналт багатай  бизнессийн сал­бар болон хувирсан байна. Ихэнх оронд нэ­мэлт бүтээгдэхүүний найрлаган дээр шаардлага тавьж, найрлага тунг нь хянадаг алба байдаггүй гэнэ. Тэгэхээр “тураана, булчин суулгана, дархлаа сайжруулна” гэдэг хүчтэй сурталчилгааны цаана түүхий гурил байхыг ч үгүйсгэх аргагүй. 

Амин дэм, микро-элементүүдийн хангалттай авах хамгийн шилдэг арга бол зөв хооллолт . Цаашдаа зөв хооллолт, цэвэр хоололт буюу генетикийн өөрчлөлттэй хоол хүнснээс хэрхэн зайлхийх талаар цуврал болгон уншигчдадаа хүргэх болно.