Ч.Зотол

Энэ хавар ураныг эсэргүүцсэн ТББ, иргэний нийгмийн байгууллага, хөдөлгөөнүүдийн тэмцлээр “амьсгалах” бололтой. ТББ-ууд тус тусдаа эсэргүүцлийн жагсаал, цуглаан зохион байгуулах мэдээлэл байна. Уран эсэргүүцэгчдийг  идэвхтэй  дэмжигч  Ч.Мөнхбаяраас цөөн асуултад хариу авлаа.

 - “Урангүй Монгол” хөдөлгөөнийхөн Дорноговь аймаг дахь “Арева” компанийн үйл ажиллагааг  эсэргүүцэж,  удаа дараа хэвлэлийн хурал хийж  байсан. Тэмцэл ямар шатандаа явж байна?

-Иргэний нийгмийнхэн шаардлагаа тавиад явж байна. Харамсалтай нь компани ч, төр, засаг ч  анхаарал муу тавьдаг. “Арева”  компани “Бид  хоргүй үйл ажиллагаа явуулдаг. 17 жил ямар ч зөрчил гаргаагүй”  гэх юм.  Гэтэл орон нутгийн хийсэн шалгалт, ураны идэвхтнүүдийн хийсэн ажиглалт, судалгаагаар олон ноцтой  зөрчил илэрсэн шүү дээ. Асуудал нэг мөр болохгүй байна. Ажлын ахиц гэвэл ард түмэн ураны тухай нэгдсэн ойлголттой болж, нийтээрээ ураныг эсэргүүцэж байгаа нь дэвшилттэй алхам.  

- “Гал үндэстэн холбоо”-ноос  ураныг эсэргүүцэж жагсах гэж байгаа юм байна. Иргэний хөдөлгөөнүүд энэ асуудлаар нэлээд идэвхитэй тэмцэх сурагтай?

-Бид янз бүрийн  тэмцэл, жагсаал, цуглаан  явуулж ирсэн. Өөрсдөө газар дээр нь очиж, ажиглалт хийж,   малчид иргэдээс  мэдээлэл авдаг. Төрийн байгууллагуудад  шаардлагаа тавьдаг. Төр, засгийн зүгээс арга хэмжээ авахгүй бол  цаашид хэрхэн тэмцэх вэ  гэдгээ ярилцана гэж бид нэлээд эрт мэдэгдсэн шүү дээ. Манай  “Урангүй Монгол” хөдөлгөөнд 20 гаруй ТББ  нэгдсэн. Тус тусдаа болоод нэгдсэн байдлаар эсэргүүцлийн арга хэмжээ зохион байгуулна. Олон улсаас ч дэмжлэг хүснэ гэсэн бодол байна.

 Эх сурвалж: www.polit.mn