Ч.ТУЛГА Баянхонгор аймгийн Заг сумын иргэдийн төлөөлөл Монгол Улсын Ерөнхий сайд У.Хүрэлсүхт хандаж хэвлэлийн хурал зарлалаа. Учир нь 2017 оны тавдугаар сард Заг суманд Түүх, архелогийн хүрээлэнгийн Эрдэнэ-Очир эрдэмтнээр ахлуулсан баг очиж, архелогийн хайгуул хийсэн байдаг. Хуулинд зааснаар архелогийн хүрээлэн малтлага хийж түүхийн ямар, үнэт өв, дурсгал байна вэ гэдгийг тоолох ёстой аж. Гэвч тус хүрээлэнгийнхэн тайлангийн материалаа Улсын бүртгэл мэдээллийн санд төвлөрүүлээгүй, БСШУСЯ-ын соёлын өв хариуцсан мэргэжлийн зөвлөлд ирүүлээгүй. Үүнийг “Централ эшиа майнинг” компани түүх, соёлын үл хөдлөх дурсгалыг шинжлэх ухааны байгууллагатай хуйвалдаж, нүүлгэн шилжүүлсэн нь хууль зөрчиж байна хэмээн үзэж байгаа юм байна. Дараагийн асуудал нь 2017 оны тавдугаар сард МУИС-ийн эрдэмтэн Батсайханаар ахлуулж, Заг суманд малтлага хийж, соёлын үнэт өв болсон дурсгалуудыг малтаж, нүүлгэн шилжүүлсэн. Үүнийгээ өөрсдөө авран хамгаалдаг гэж тайлбарладаг. Гэвч мэргэжлийн байгууллага хэдэн тооны түүхийн дурсгалыг малтаж авсан тухай ямар ч мэдээлэлгүй байна. “Централ эшиа майнинг” компанийн газар нутагт байх эдгээр түүхийн дурсгалыг  хоёр эрдэмтнээр дамжуулж, хууль бусаар авч буйг Заг сумын итгэмжлэгдсэн төлөөлөгч Б.Туяа мэдээлсэн юм. “Монгол Улсын Ерөнхий сайдын толгойлсон Засгийн газар, хариуцсан яам нь уул уурхайн эрх олгохдоо энэ газар ямар түүх дурсгалын эд зүйлс хадгалагдаж байгааг эхлээд судалдаг болмоор байна. Үүнд хариуцлагатай ханддаг болох хэрэгтэй” гэж Заг сумын иргэн, Заг хөдөлгөөний иргэн Алтантуяа онцолж байв. Тиймээс түүх дурсгалын ховор олдворуудыг хууль бусаар ухаж буй яамандаа хариуцлага тооцохыг Ерөнхий сайд У.Хүрэлсүхээс хүсч байна гэв. Эх сурвалж: www.polit.mn