Ч.ГАНТУЛГА ЖДҮХС-аас өндөр хэмжээний зээл авсан төрийн өндөрлөгүүд ямар нэг хариуцлага хүлээхгүй байх хуулийн цоорхой байна, зээлээ төлөхгүй байх нөхцөл бүрдлээ гэсэн мэдээлэл цахим сүлжээнд цацагдаж эхэлсэнтэй холбогдуулж Баялаг бүтээгчдийг дэмжих холбооноос мэдээлэл хийлээ. Тэд энэ төрийн түшээд ч хуулийн хүрээнд байх ёстой. Эрх мэдлээ ашиглаж, их хэмжээний зээл авсан нь нь ЖДҮ-ийн цаашдын хөгжилд дайсагнасан үйл явдал болж байна гэж үзэж буйгаа илэрхийлсэн юм. Тиймээс энэ сарын 25-нд 12:00-16:00 цагийн хооронд жагсаал цуглаан хийх хуулийн дагуу жагсаал зохион байгуулах болсноо Баялаг бүтээгчдийг дэмжих холбооны гүйцэтгэх захирал Т.Батдэлгэр мэдэгдлээ. Жагсаалд Баялаг бүтээгчдийг дэмжих холбоо болон төрийн бус байгууллагууд оролцох юм байна. Жагсаал хийх мэдээлэлтэй холбоотойгоор тус сангаас байгууллагууд руу таван шаардлага бүхий бичиг явуулжээ. Үүнд “ Нэгдүгээрт албан тушаалын давуу байдлаа ашиглаж ЖДҮХС-аас зээл авсан УИХ-ын гишүүд болон төрийн өндөр албан тушаалтнуудад хариуцлага тооцохыг шаардах. Хоёрдугаарт УИХ-ын гишүүд болон төрийн өндөр албан тушаалтангууд мэдээллийн давуу байдлаа ашиглаж, ЖДҮХС-аас авсан зээлийг буцаан яаралтай төлүүлэх. Гуравдугаарт сангийн яамнаас ЖДҮХС-нд хийсэн шалгалтын дүнг олон нийтэд яаралтай танилцуулах. Дөрөвдүгээрт ЖДҮХС-аас олгож буй зээл, төсөл сонгон шалгаруулалтыг нээлттэй, шилэн болгохыг шаардах. Тавдугаарт одоо УИХ-дээр хэлэлцэж байгаа ЖДҮ-ийг дэмжих хууль, татварын хууль, орлогын албан татварын хууль, бараа бүтээгдэхүүн худалдан авах хууль зэрэг баялаг бүтээгчдийн эрх ашгийг хамгаалсан хуулийг яаралтай хэлэлцэх шаардлага тулгараад байна” гэж шаарджээ. Эх сурвалж: www.polit.mn