Ч.ГАНТУЛГА

“Гурван охин” хамтлагийн ахлагч, дуучин Д.Солонго буюу Солотой холбогдлоо. Түүнтэй уран бүтээл, үзэл бодлынх нь тухай ярилцсанаа хүргэе.

-Сайн уу. “Утасны анд” байна. Энэ өдрийн мэндийг хүргэе?

-Баярлалаа. Чамд ч гэсэн өдрийн мэнд.

-Өнөөдөр та ямар ажил төлөвлөсөн бэ?

-“Хурдлах тусам” шинэ цомог маань хэвлэлтээс ирсэн. Цомогт орсон дуунуудаа клипжүүлэх ажил эхэлчихсэн зав муутай байна. Өнөөдөр зураг авалттай. Яг одоо явж байна.

-Танай хамтлаг продюсергүй байсны эцэст “B” продакшнд харъяалагдах болсон. Яагаад дуучин Д.Болдыг сонгосон юм бэ?

-Манай өмнөх цомог дээр “B” продакшны залуус ажилласан юм. Тиймээс шинэ цомог дээрээ дуучин Д.Болдтой хамтрахаар шийдсэн. Бидний уран бүтээлийг дэмждэг, мэдэрдэг, ойлгодог гэж ойлгож болно.

-Цомогт орсон дуунуудыг сонсоход та гурав өнгө төрх, дуулалтаа эвдэж, өөрчлөх гэж оролдсон юм шиг санагдлаа?

-Цомгийн хөгжмийн найруулгыг Н.Баярхүү, тохируулгыг саунд инженер Костантин Ноников гүйцэтгэсэн. Дуунуудын шүлгийг ZZ, Соёмбо нар бичиж, бүх дууны хөгжмийг дуучин Д.Болд зохиосон байгаа. Дуучид нэг хэвэнд баригдах нь буруу. Тиймээс бид арай өөр өнгө аяс харуулахыг хичээлээ.

-Дуучин Солог энгийн байхдаа илүү үзэсгэлэнтэй харагддаг гэх юм билээ. Та гоо сайхандаа хэр анхаардаг вэ?

-Бидний мэргэжил хүссэн хүсээгүй гоо сайхан байхыг шаарддаг шүү дээ. Тиймээс тодорхой хугацааг зарцуулалгүй яахав.

-Таныг гоо сайхны хагалгааг дэмждэг гэж бодож байна. Тиймүү?

-Бүсгүй хүн бүхэн гоо сайхан харагдахыг хүсдэг. Тиймээс өөрт таалагдахгүй байгаа зүйлээ өөрчилж яагаад болохгүй гэж.

-Охидын хамтлагийг дэлгэцээр нүцгэн шахуу гарч, хүүхдүүдэд буруу үлгэр үзүүлж байна гэж шүүмжилдэг. Та ямар бодолтой байна?

-Жаахан цензур хэрэгтэй байх. Гэхдээ залуу насныхаа гоо сайхныг тодорхой хэмжээнд харуулах хэрэгтэй гэж боддог юм. Залуу насаараа чимэх сайхан. Хөгжмийн ертөнц өөрөө шоу шүү дээ. Хүмүүсийн хандлага, дэлхийн жишиг ямар байна. Тэндээс бид зөв үлгэр дуурайл авах хэрэгтэй юм болов уу.

-Та хэзээ гэр бүл зохиох вэ?

-Цаг нь ирэхээр болох байх. Сайхан гэр бүлтэй, хөөрхөн хүүхдүүдтэй болох хүсэл мэдээж бий. Амьдралын хамгийн үнэтэй утга учир элэг бүтэн гэр бүл байдаг.

-Тэгвэл ямар залуус таалагддаг бол?

-Намайг хайр­ладаг, хүн­дэл­дэг, ойлгодог, мэдэрдэг.