Д.АРИУН

Ашигт малтмалын газрын дарга Г.Алтансүх ажлаа өгч түүний оронд үүрэг гүйцэтгэгчээр Д.Үүрийнтуяа гэдэг хүнийг томилжээ. Ажлаа өгсөн хийгээд үүрэг гүйцэтгэхээр хүлээж авсан хоёр хүний талаар сайн саар янз бүрийн мэдээлэл байна. Ашигт малтмалын газар гэдэг угаасаа л хэл ам дагуулсан хэцүү газар. Өмнөх дарга Г.Батхуяг болон түүний дор ажиллаж байсан хэд хэдэн хүн өдгөө ял шийтгэл хүлээчихээд байгаа. Тиймээс Г.Алтансүхийг Ашигт малтмалын газрын даргын албан тушаалаас буусныг зарим хүн “Муу юмнаас ашгүй холуур өнгөрөх нь” гэж товчхондоо бол сайшааж байхад “тагнуулынхан албан тушаалынхаа хүрээнд олсон мэдээллээ хувийн зорилгоор ашигладаг” гэсэн шүүмжлэл ч бас дагалдаж байна.

Ашигт малтмалын газрын дарга асан Г.Алтансүх тагнуулч. Тодруулбал, Тагнуулын ерөнхий газрын дэд даргын албыг хашиж байсан нэгэн гэхээр бүр мэргэжлийн хүн гэсэн үг. Ашигт малтмал гэдгийн цаана улс орны томоохон эрх ашиг бий гэдэг утгаараа харж Г.Алтансүхийг энэ албанд Ерөнхий сайд Сү.Батболд томилсон гэдэг. Ингэж өмнөх Засгийн газрын үед томилогдсоноос гадна бас Г.Алтансүх гэдэг энэ эрхэм МАН гэдэг намтай салшгүй холбоотой нэгэн. Төрийн ордны өмнөх талбай дээрээс нэр нь арилж, бас одоо хөшөө нь “нутаг заагдах” дээрээ тулаад байгаа жанжин Сүхбаатарын ач. Энэ утгаараа тэрээр МАН-тай холбоотой хүн. Хаана ч, ямар ч ажил албан дээр заавал Ардчилсан намынхан томилогдож байх ёстой гэдэг бичигдээгүй хууль үйлчилж, хамтарч засаг барьж байгаа “Шударга ёс” эвсэлтэйгээ байгуулсан гэрээгээ ч биелүүлэхгүй байгаа АН-ын даргын хувьд Г.Алтансүх мэтийн томилгоонд “түгжрэл” үүсгээд байсан нөхдөөс салах далим гарахыг хүлээж байсан биз ээ. Учир нь Г.Алтансүхийг ажлаас чухам ямар үндэслэлээр чөлөөлсөн бэ гэдэг шалтгаан тодорхойгүй байгаа юм. Тэгэхээр Жанжин Сүхийн ач Засгийн тэргүүнд таалагдсангүй ажлаа өглөө гэдэг нь үнэнд ойрхон болж таарч байгаа юм. Г.Алтансүхийн оронд үүрэг гүйцэтгэгчээр томилогдоод байгаа Д.Үүрийнтуяа АН-ын харьяат. Тус газрын дэд даргаар ажиллаж байгаа. АН дотроо С.Эрдэнийн хүн гэдэг тодотголтой нэгэн аж.

Эх сурвалж: www.polit.mn