Д.СОДОН

ОХУ-ын Санкт-Петербург хотод зохион байгуулсан Олон улсын эдийн засгийн форумын үеэр байгалийн хийн хоолойг өөрийн нутаг дэвсгэрээрээ дамжуулах асуудлаар Ерөнхий сайд Н.Алтанхуяг ОХУ-ын Ерөнхийлөгчөөс нааштай хариу сонссон тухай хэвлэлүүд мэдээлсэн. Энэ уулзалтаас Манай Газрын тосны газар, нефть импортлогчид ч ганзага хоосон ирээгүй гэнэ. Монгол Улс нефтийн хэрэглээнийхээ 60 хувийг ОХУ-аас, тэр дундаа төрийн өмчийн газрын тосны магнат “Роснефть” компаниас импортолж байгаа. Форумын үеэр Газрын тосны газрын дарга Г.Өлзийбүрэн “Роснефть” компанийн ерөнхийлөгч Игорь Сечин нар Хамтын ажиллагааны протоколд гарын үсэг зурсан байна. Ингэснээр “Роснефть” компани Монголд нефтийн бүтээгдэхүүний хангамжийн дэд бүтэц бий болгох, нефть болон хийн ордод хайгуул хийх эрх үүссэн аж. Үүнээс гадна “Роснефть” компани манай “Магнай Трейд”, НИК, “Шунхлай” групптэй хамтран ажиллах, газрын тосны бүтээгдэхүүнээр хангах таван жилийн гэрээ байгуулжээ. Гэрээний дагуу ирэх сарын сарын 1-нээс 2019 оны тавдугаар сарын 31 хүртэл сая гаруй тонн газрын тосны бүтээгдэхүүнийг манай улсад нийлүүлэх аж. Нийлүүлэлтийн өртөг нэг тэрбум доллар байх гэнэ. Мөн Сингапурын биржийн өртгөөр гэрээг хийснээр өмнөхөөсөө хямдаар шатахуун нийлүүлэх болжээ. Энэ талаар Газрын тосны газрын дарга Г.Өлзийбүрэнгээс зарим зүйлийг тодрууллаа.

-Хамтын ажиллагааны протоколд гарын үсэг зурснаар манай талд ямар боломж нээгдэх вэ?

-“Роснефть” ком­панийн ерөнхийлөгч И.Сечин өмнө нь Мон­голд айлчлахдаа нефть бүтээгдэхүүнийг хоо­лойгоор нийлүүлэх болом­жийг судлах, газ­рын тосны хайгуул, судалгааны ажилд оролцох сонирхлоо илэрхийлсэн. Мөн манай авиа компаниудыг онгоцны түлшээр хангах, шинээр барих онгоцны буудалд түлш нийлүүлэх саналаа тэр үед тавьсан юм. Хамтын ажиллагааны протоколд гарын үсэг зурснаар эдгээр саналыг судлах, ажил хэрэг болгох чиглэлээр хамтран ажиллахаар болсон.

-Манай импортлогч компаниудтай таван жилийн гэрээ байгуулжээ. Өмнөхөөсөө хямд үнээр шатахуун  авахаар болж. Үүнээс жилд хэчнээн төгрөг хэмнэх вэ.Энэ үнэ буурснаар жижиглэнгийн үнэд нөлөөлөх үү?

-Импортлогч ком­па­ниуд “Роснефть”-тэй Сингапурын бир­жийн ханшаар гэрээ бай­гуул­сан. Өмнөхөөсөө 50-100 ам.доллараар хямд гэсэн үг. Жилийн өм­нөхөөс 300 доллараар хямд өртөг. Хилийн үнэ хямд­рахад жижиглэнгийн үнэ мэдээж буурдаг. Гэвч валютын ханш өн­дөр байгаа учраас жижиг­лэнгийн үнэд эерэг өөрчлөлт гарахгүй байх. Улс орны эдийн засагт мэдээж эерэг нөлөөтэй. Бид сард доод тал нь 7-10 сая, жилд 120 сая ам.доллар хэмнэх ашигтай гэрээ хийж чадсан.