Т.ДАЛАЙ

Нийслэлийн 52 байршилд газар өмчлүүлэх ажил ирэх сард эхэлнэ. Гэвч сүүлийн үед цахим ертөнцөөр газар өмчлөх ажил эхэлсэн талаар мэдээлэл цацагдаж системд нь нэвтрэн одоогийн байдлаар олон мянган иргэн бүртгүүлээд байгаа юм.  Энэ талаар Нийслэлийн өмчийн харилцааны газрын дарга Ш.Төмөрбаатараас тодрууллаа.

-Өмчлөлийн цахим систем бэлэн боллоо гэсэн мэдээллээс болж олон нийтийн дунд төөрөгдөл үүслээ. Энэ асуудлыг хэрхэх вэ?

-Санаатай биш санамсаргүй ийм асуудал боллоо. Ирэх сард бидний ажил албан ёсоор эхэлнэ. Мэдээж одоо бүртгүүлээд байгаа хэдэн мянган хүний хүсэлт хүчингүй гэсэн үг. Бид цахим хэлбэрээр санал авахаасаа 10-15 хоногийн өмнө  төвийн томоохон хэвлэлүүдээр зар түгээнэ. Тэр хугацаанд иргэд газар өмчлөх өргөдлөө өгнө. 

-Газар өмчлөлийн асуудлаар иргэд ямар их хүлээлттэй байна гэдгийг энэ үйл явдал харууллаа. Яг хэзээ эхлэх вэ?

-Нөгөөдөр НИТХ-ын тэргүүлэгчдийн хуралдаан болно. Энэ хуралдаанаас хугацааг товлох юм. Бидний тооцоо бол ямар ч гэсэн ирэх сарын эхний хагаст эхлэх болов уу гэсэн төлөвлөөтэй байна.  Уг нь бэлтгэл ажил дууссан.

-Газрын тухай хуульд Монгол Улсын иргэн бүр 0.07 га газар өмчлөх эрхтэй хэмээн заасан байдаг. Гэтэл та бүхэн журмандаа 0.05 га гэсэн байна. Энэ зүйд хэр нийцэж байгаа вэ?

-Газар бол хүн бүхэнд олгогддог баялаг биш. Тиймээс бид аль болох олон хүнд хүргэх олон хүнийг газартай болгох зорилгоор энэ асуудлыг оруулсан.  Бид өөрсдөө завшаад байгаа юм биш. Гэхдээ НИТХ-ын тэргүүлэгчид маань зөвшөөрөхгүй бол өөрчлөлт оруулна.