Т.БАТСАЙХАН

Байгаль дэлхийгээ хайрлан хамгаалах хүсэл сонирхолтой байгууллагууд нэгдэн өглөө эртлэн Хийморийн овоог зорьлоо. Энэ удаа хийморио сэргээн хүслээ шивнэх гэсэн хүсэл өвөртөлсөнгүй.  Хадаг яндар, элдэв шил, лаазанд дарагдсан  овоогоо цэвэрлэх зорил­го­той очсон юм. Байгаль хамгаалах сан, “Дагшин байгалийн андууд” ТББ, Зэвсэгт хүчний 150 дугаар ангийн хамт олон энэхүү сайн үйлсийн аянд нэгдсэн юм.

Хийморийн овоо маань сүүлийн үед хадган овоо болон намирах болжээ. Уг нь эдийн дээд хадаг гэж бид эрхэмлэн дээдэлдэг ч гэлээ уул овоо, мод бутанд зүүж ирсэн түүх үгүй билээ. Гэтэл сүүлийн жилүүдэд хаа сайгүй хадаг уях болж, энэ нь эргээд байгаль дэлхийгээ бохирдуулж байгаа талаар аянд оролцогчид хэлж байв. Мөн хятадууд хадгийг нефтийн шараар хийдэг болжээ. Энэ нь аливаа газарт уяхад тасрахгүй, төмөр утас шиг бат бөх болсон гэнэ.

Мөн байгаль дэлхийн хөрсөнд шингэхдээ тун удаан бөгөөд маш их хор хохирол учруулдаг байна. Тиймээс бидний эрхэмлэн дээдэлдэг хадаг байгаль хамгаалагчдын хувьд бол дайсан нь болж хувирсан байна.  Мөн хадгийг овоо мододдоо зүйхгүй байх нь байгаль дэлхийдээ өгч байгаа бас нэгэн бэлэг болж байна. Уг нь монголчууд гэрийнхээ гаднаас уул усандаа цай сүүнийхээ дээжийг өргөдөг, дотоод сэтгэлдээ сүслэн залбирдаг байсан бол өдгөө уулан дээрээ гарч, овоо дээрээ очиж байж энэ үйлдлээ хийдэг болсон.

Хүн гэдэг сэтгэлийн амьтан учраас дэргэд нь очиж, дээр нь гарч байж хийморь лундаа сэргэж, ажил амьдрал тэгшрэх  юм шиг сэтгэдэг болсон гэнэ. Энэ буруу тогтолцоог халах нь зөв гэдгийг Хийморийн овоог цэвэрлэж буй ажлын хэсгийнхэн хэлж байв.

Тэдний энэ цэвэрлэгээ зөвхөн Хийморийн овоогоор дуусахгүй. Цаашид Туул голын сав газарт багтах 20 гаруй овоог цэвэрлэнэ гэлээ. Байгаль хамгаалах сангийн тэргүүн М.Хүрэлсүх “Бид байгаль дэлхийтэйгээ ингэж харьцахаа болих хэрэгтэй. Мөн дуртай газраа овоо, суварга босгодог болжээ. Түвдийн ард түмэн нэг хэсэг яг ийм байсан гэдэг. Гэтэл тэдний хувь заяа сайн болоогүй л байна. Тиймээс уламжлалаа бодсон ч гэлээ бид энэ үйлдлээ зогсоох хэрэгтэй” гэлээ. 

Мөн ирэх зургадугаар сарын 6-нд Бурхан Халдун уулын Босгын давааны овоон хогийг цэвэрлэнэ. Бөө нартай хамтран тэрхүү овоог цэвэрлэхийн зэрэгцээ хийморийг нь сэргээх юм байна.