Б.ТӨГС Монголын эмэгтэйчүүдийн холбооноос санаачлан Монголын өмгөөлөгчдийн холбоо, Нийслэлийн гэмт хэргээс урьдчилан сэргийлэх ажлыг зохион байгуулах зөвлөл хамтран “Хүчирхийлэгчийг хүчгүйдүүлье” хөдөлгөөнийг өрнүүлж байна. Энэ хүрээнд Монголын эмэгтэйчүүдийн холбооноос охид, хөвгүүдээс эхлээд нийгмийн нас, бүлэг бүрт хандсан, шат дараалсан хөтөлбөр боловсруулж ажиллахаар төлөвлөжээ. Үүнээс нэн түрүүнд Монгол Улсын хэмжээнд Охидын клубыг байгуулж, тэднийг эрхээ хамгаалах, хүчирхийлэлтэй тэмцэх арга зүй, мэдээ мэдээллээр хангахад туслах ба энэ ажилд сайн дурынхны хүчин чармайлтыг чиглүүлэх аж. Харин Монголын өмгөөлөгчдийн холбооноос хүчирхийлэлд өртсөн хүүхэд, эмэгтэйчүүд бүрт үнэ төлбөргүй хуулийн зөвлөгөө өгөхөөр болжээ. Статистик мэдээгээр Монгол Улсын хүн амын 50.8 хувь нь эмэгтэйчүүд байдаг. Тэднээс 78 мянган эмэгтэй өрх толгойлон амьдарч, хагас болон бүтэн өнчин 37 мянган хүүхэд өсч байна. Монголд гэр бүлийн хүчирхийлэлд өртөгсдийн 86 хувь нь айдаст автах, нэр төрөө бодох, үр хүүхдийнхээ ирээдүйд санаа зовиних, ах дүүс хамаатан садны доромжлол зэрэг сэтгэлзүйн дарамт шахалтаас үүдэн хүчирхийллийг нуун амьдардаг бөгөөд 14 хувь нь тэсвэр барагдахын үед хуулийн байгууллагад ханддаг гэж тэд мэдээллээ. Эх сурвалж: www.polit.mn