Б.ТӨГС “Иргэдийн шударга шүүх” төрийн бус байгууллагын тэргүүн Х.Бат-Ялалт Үндэсний мэдээллийн төвд олон нийтэд хандан мэдэгдэл хийлээ. Тэрээр юуны өмнө цагдаагийн албан хаагч амиа алдсанд харамсаж байгаагаа илэрхийлсэн юм. Гэхдээ өнгөрсөн хугацаанд энэ хэрэгт өөрийг нь буруутгаж, гүтгэж байгаад хариулт өгөх гэж энэхүү хэвлэлийн хурлыг зарласан гэв. Булган аймгийн хэсгийн төлөөлөгч ослоор амиа алдахаас хэдхэн хоногийн өмнө “Иргэдийн шударга шүүх” төрийн бус байгууллага тус аймагт очиж байцаагдаж байгаа иргэний эрхийг хамгаалахаар ажиллаж, улмаар бичлэг хийн олон нийтийн сүлжээнд цацсан нь дарамт болсон гэсэн мэдээлэл цацагдаж байгаа. Тэгвэл хоёр тусдаа асуудлыг хольж хутган, зориудаар нэр хүндэд нь халдах оролдлого гэж үзэж байгаагаа тэрээр хэллээ. Мөн энэ асуудалд эмзэглэж байгаа ч бид хуулийг хэрэгжүүлэхийг шаардсан үндсэн чиглэлээсээ хазайхгүй гэсэн юм. Түүний мэдэгдэлд: “Монгол Улсын иргэн Х.Бат-Ялалт миний бие улс, эх орон, ард түмнийхээ өмнө өргөсөн андгай тангарагтаа үнэнч байж шударга ёсны төлөө, хууль ёсыг чанд сахиулахын төлөө тууштай тэмцэхээ хариуцлагатайгаар мэдэгдэж байна. Юуны өмнө харамсалтайгаар амиа алдаж буй монгол хүн бүрийн төлөө эмгэнэн гашуудаж байгаагаа илэрхийлье. Монгол хүний үнэ цэнэ, үнэлэмж өдрөөс өдөрт буурсаар байна. Монгол хүмүүс нэгнээ өмсч зүүсэн, эдэлж хэрэглэсэн, гарал үүсэл, нам эвсэл нутаг ус, эд хөрөнгө, эрх мэдлээр нь ялгаварлан гадуурхаж, талцан хуваагдаж байгаад харамсаж байгаагаа илэрхийлье. Монгол Улсын төрийн албан хаагчид, ялангуяа цагдаа, прокурор, шүүхийн албан хаагчид бусдын эрх, эрхч чөлөөг өөрийн эрх мэдлээрээ далайлган зөрчих, хохироох явдлыг таслан зогсоохын төлөө ажиллах болно. Өнгөрсөн хугацаанд миний бие төрийн албан хаагчдын буруутай үйлдлээс хүний эрх зөрчигдөх явдлыг таслан зогсоох зорилгоор энэ байгууллагыг үүсгэн байгуулж, 10 мянга гаруй иргэдэд хуулийн туслалцаа, зөвлөгөөг үзүүлж, 1000 гаруй иргэдийн эрхийг хамгаалан давхардсан тоогоор 2000 гаруй төрийн албан хаагчдын алдаатай үйл ажиллагааг илчилжээ. Төрийн албан хаагчдын мэргэжлийн ур чадвар, сахилга бат, хариуцлагыг нэмэгдүүлэх зайлшгүй шаардлага байгааг өнгөрсөн хугацаанд болсон үйл явдлууд тодорхой харууллаа” гэжээ. Эх сурвалж: www.polit.mn