С.УЯНГА

Ус, цаг уур, орчны хүрээлэнгийн Урьдчилан мэдээлэх секторын эрхлэгч Ж.Цогтоос энэ сарын цаг агаарын төлөвийг тодрууллаа.

-Сүүлийн өдрүүдэд цас орж сэрүүслээ. Сарын эхээр цаг агаар ямар байх бол?

-Баруун талаасаа сэрүүсч эхэллээ. Зүүн аймгууд болон  говь,  төвийн аймгуудад хүчтэй шуургатай  байсан. Салхи хүчтэй салхилснаас Сэлэнгэ аймагт түймэр гарч нэлээд утаатай байлаа. Өнөөдөр /өчигдөр/ зарим аймгуудад 5-6 сантиметр, Баянхонгор, Өвөрхангай аймгийн хойд сумд  10-12 сантиметр цасан бүрхүүл тогтсон  байна.  Хэнтий, Төв, Дундговьд цас бороо үргэлжлэн орж байна. Харин шинэ сарын эхний арав хоногт ихэнх нутгаар сэрүүхэн, цас бороотой байх төлөвтэй байгаа. Улаанбаатарт ч гэсэн цас орж сэрүүснэ. Ер нь энэ сарын эхний арав хоног, сарын сүүлээр төвийн нутгаар хүйтрэх  хандлага ажиглагдаж байна. Ялангуяа энэ амралтын өдрүүдэд нийслэлд шөнөдөө 3-8 градус хүйтэн, өдөртөө 0-5 градус дулаан байна.

-Хаврын тариалалт эхэлсэн. Цаашид бороо цас үргэлжилж орвол тариалалтад нөлөөлөх үү?

-Тариалалтын ажил ид явагдаж байхад тунадас ихтэй, сэрүүхэн байгаа нь нэг талаараа хөрсөнд чийг өгөөд тариаланчдад хэрэгтэй байх. Гэхдээ нялх төл, самнасан малд хэцүү. Цаашид зарим аймгуудад ахиухан тунадас орж үе үе хүйтрэх шинжтэй  байгаа учраас цочир хүйтрэлтээс болж тариалан хайрагдахаас  болгоомжилж байна.  Хэрвээ цочир хүйтрэхээр бол тариаланчдад урьдчилан мэдэгдэх  арга хэмжээ авна. Өнгөрсөн сард дөрвөн удаа тунадас орж газарт чийг өгсөн нь  гал түймэр гарах эрсдлийг  нэлээн сайн намжаалаа.