Т.БАТСАЙХАН

Газар өмчлөлийн асуудал хүн бүрийн анхаарлын төвд байна. Бараг жилийн өмнөөс нийслэлийн 52 байршилд  гэр бүлийн зориулалтаар газар өмчлүүлнэ гэсэн мэдээлэл Хангарьд ордны зүгээс гарч байв.  Энэ мэдээг газартай болох хүсэлтэй иргэд баяртай хүлээж авсан.

Хотын дарга таны шийдвэрээр газар өмчлүүлэх ажил өнгөрсөн дөрөвдүгээр сарын 1-нээс эхлэх байв. Гэвч цахим хэлбэрээр авах учраас техникийн шинэчлэл дуусаагүй, дахин төлөвлөлтийн зураг гараагүй гэсэн шалтгаанаар нэг сарын хугацаатай хойшилсон.  Харин та бүхэн энэ асуудлаар саяхан хуралдаж нэгэн хачирхалтай журмын тухай хэлэлцжээ. Танай салбарын дарга нар ч дэмжиж байна.

Хачирхалтай гэсний учир нь энэ журам Монгол Улсын Газрын тухай хуулиас давсан эрх мэдэлтэйд байгаа юм.  Хот байгуулалт, хөрөнгө оруулалтын асуудал хариуцсан орлогч С.Очирбатын танилцуулснаар энэ удаад газар өмчлүүлэхдээ нэг иргэнд 0.05 га газар өгөх болжээ. Бид хуульдаа нэг иргэнд 0.7 га газар өмчлүүлнэ хэмээн цагаан цаасан дээр хараар бичсэн. Тэгэхээр энэ заалт  хуульд нийцэхгүй байна. Таныг  энэ асуудлыг ойлгож анзаарч байгаа гэж найдъя. Мөн дээрх журамд 2013 оны тавдугаар сарын 30-наас өмнө нийслэлд шилжин ирсэн иргэд хамрагдах юм байна.  Тэгэхээр жилийн өмнө нийслэлийн иргэн болсон хүнд газар өмчлөх эрх байхгүй. Энэ нь эргээд иргэдээ ялгаварлан гадуурхсан заалт болж хувираад байна. Хотын дарга аа.

Мөн бид сугалаагаар газартай болно. Тэр төмөр машинд таалагдахгүй л  бол хохь гэсэн үг.  Тэгээд газартай болж чадаагүй хэсэг нь та бүхэнд гомдол гаргах биш төмөр машин мөргөөд өнгөрөх нь. “Төмөр машинаар шийдэх нь илүү шударга болно” хэмээн танай хүмүүс тайлбарлаж байна. Яагаад, ямар учраас шударга болох вэ гэсэн баталгааг Хотын дарга  иргэддээ хэлж тайлбарлаж өгнө үү.   Тэгээд ч газар өмчлөлийн асуудал мэдээж том ажил. Олон жилийн өмнөөс төлөвлөж, зураг төсөл гаргаж хийж байгаа. Гэхдээ өнөө маргаашгүй цахим хэлбэрээр өргөдөл аваад эхэлнэ.  Өмчлөлийн ажлын яг  босгон дээр боловсруулсан журам тань шог байгааг дуулгая. Хотын дарга аа?